މާލޭގައި އެއްވެސް ސާފުތާހިރު ކަމެއް ނެތި ހިންގަމުން ދިޔަ ތަނެއް ރެއިޑް 15 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.
މޯލްޑިވްސް އިމިގްރޭޝަނުން ބުނީ މި މީހުން އަތުލައިގަތީ ބިދޭސީން ރާއްޖޭގައި ކުރަމުންދާ ވިޔަފާރިއަކާ ގުޅިގެން ޓާސްކު ފޯސްއަށް ލިބިފައިވާ މަޢުލޫމާތަކާ ގުޅިގެން މިދިޔަ ހޮނިހިރު ދުވަހު ކުރިއަށް ގެންދިޔަ ރެއިޑްގެ ތެރެއިން ކަމަށެވެ.
އެގޮތުން ހ. ބިއަންކާ ބަލައި ފާސްކޮށް އެ ތަނުގައި ގަވާއިދާ ހިލާފަށް އުޅެމުން ދިޔަ 15 ބިދޭސީއަކު އެ ދުވަހު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށް އެ އިދާރާއިން ބުނެ އެވެ.
"މި ރެއިޑުގައި ވެސް ކަމާގުޅުން ހުރި އިދާރާތަކުން ވަނީ ބައިވެރިވެފައި. އަދި މިތަނުގައި ކުރަމުން ދިޔަ ވިޔަފާރި ހުއްޓުވުމަށް ވަނީ ނޯޓިސް ދީފައި،" އިމިގްރޭޝަނުން ބުންޏެވެ.
ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދުމަށް މިހާރު ކުރިއަށް ގެންދާ އޮޕަރޭޝަންތަކުގައި އެއްވެސް ސާފުތާހިރު ކަމެއް ނެތި ހިންގަމުން ދިޔަ ތަންތަން މީގެކުރިންވެސް ހޯދައި އެ ތަންތަނުގައި ގަވައިދާ ހިލާފަށް އުޅެމުން ދިޔަ ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފައިވެ އެވެ.