އިމިގްރޭޝަނާ ގުޅުންހުރި މައްސަލަތައް ރިޕޯޓްކުރުމަށް ގާއިމުކޮށްފައިވާ "އިމިގްރޭޝަން ވޮޗް" އަށް 500 އެއްހާ މައްސަލަ ރިޕޯޓް ކޮށްފައިވާ ކަމަށް މޯލްޑިވްސް އިމިގްރޭޝަނުން ހާމަކޮށްފި އެެވެ.
އިމިގްރޭޝަނުން ބުނީ އިމިގްރޭޝަން ވޮޗް ޖުލައި މަހުގެ 17ވަނަ ދުވަހު އިފްތިތާހުކުރި ފަހުން މި މަހުގެ 26 ވަނަ ދުވަހުގެ ނިޔަލަށް ޖުމްލަ 473 މައްސަލަ ރިޕޯޓުކޮށްފައިވާ ކަމަށެވެ. މީގެތެރެއިން 369 މައްސަލަ އިމިގްރޭޝަނުން ބަލަމުންދާ ކަމަށްވެސް ބުންޏެވެ.
މީގެއިތުރުން ކަށަވަރު ކުރަމުންދާ މައްސަލަތަކުގެ އަދަދު 82 އަށް އަރާ ކަމަށް އިމިގްރޭޝަނުން ބުންޏެވެ. އަދި އެ އިދާރާއާ ނުގުޅޭ 22 މައްސަލައެއް ރިޕޯޓް ކޮށްފައިވާ ކަމަށްވެސް ބުންޏެވެ.
އިމިގްރޭޝަން ވޮޗަކީ އިމިގްރޭޝަނާ ގުޅުންހުރި މައްސަލަތައް ރިޕޯޓް ކުރުމަށް އާންމުންނަށް ފުރުސަތު ލިބޭ ގޮތަށް އެކުލަވާލާފައިވާ ޕްލެޓް ފޯމެެކެވެ.
މިޕްލެޓްފޯމުގައި ކޮންމެ މީހަކަށްވެސް ގަވާއިދާ ހިލާފަށް އުޅޭ ބިދޭސީއެއްގެ މައްސަލަ ނުވަތަ ރާއްޖެއަށް ވަގަށް އެތެރެވާން މަސައްކަތް ކުރާ ބިދޭސީއެއްގެ މައުލޫމާތު ރިޕޯޓް ކުރެވޭނެ އެވެ.
ޕްލެޓްފޯމް މެދުވެރިކޮށް އަމިއްލަ އައިޑެންޓިޓީ ހާމަނުކޮށް، "އެނޮނިމަސް" ކޮށްވެސް ރިޕޯޓް ކުރުމުގެ ފުރުސަތު ލިބެ އެވެ. އިމިގްރޭޝަން ދެކޭ ގޮތުގައި މިކަމުގެ ސަބަބުން އިމިގްރޭޝަނާއި އާންމުން ގުޅިގެން ވަރަށް ފުރިހަމަ މަސައްކަތްތަކެއް ކުރުމުގެ ފުރުސަތު ލިބިގެންދެ އެވެ.
އިމިގްރޭޝަން ވޮޗަށް އާންމުންނަށް 24 ގަޑިއިރުވެސް މައްސަލަ ރިޕޯޓްކުރެވޭނެ އެވެ. އަދި ގުޅުންހުރި ރިޕޯޓެއް ނުވަތަ މައްސަލައެއް ހުށަހަޅާއިރު މައުލޫމާތާއި ފޮޓޯވެސް ޕްލެޓްފޯމް މެދުވެރިކޮށް ހުށަހެޅެ އެވެ.