މަޖީދިއްޔާ ސްކޫލުގެ ޕްރިންސިޕަލް އައިޝަތު މުހައްމަދު ސޯލިހާއި ޑެޕިއުޓީ ޕްރިންސިޕަލް ޝީޒާ އަލީ ވަކިކުރަން ގޮވާލައި އެޑިޔުކޭޝަން މިނިސްޓްރީއަށް ޕެޓިޝަނެއް ހުށަހަޅައިފި އެވެ.
އެޑިޔުކޭޝަން މިނިސްޓަރު އިސްމާއިލް ޝަފީއުއަށް ބެލެނިވެރިންގެ ފަރާތުން ފޮނުވާފައިވާ ޕެޓިޝަންގައި 35 ކަމެއް ފާހަގަކޮށްފައިވެ އެވެ.
ޕެޓިޝަނުގައި ފާހަގަކޮށްފައިވާ މައްސަލަތަކުގެ ތެރޭގައި ބެލެނިވެރިންނާއި މެޖޭމަންޓާ އޮންނަންޖެހޭ ގުޅުން ނެތުމާއި، ދަރިވަރުންނާއި ޓީޗަރުން ތަފާތު ކުރުމާއި ޕްރިންސިޕަލާއި ޑެޕިއުޓީ ޕްރިންސިޕަލްގެ މެދުގައި އޮންނަންޖެހޭ ގުޅުން ނެތުމާއި، ދަރިވަރުންނަށް ހޯދައިދޭންޖެހޭ ފުރުސަތުތައް ހޯދައިނުދިނުމާއި، ވެރިންގެ ނާގާބިލް ކަމާ ހެދި ތަނުގައި ތިބި ރަނގަޅު ޓީޗަރުން ސްކޫލު ދޫކޮށް ދިއުން ހިމެނެ އެވެ.
މީގެއިތުރުން ޕްރިންސިޕަލް އިސްވެ ހުންނަވައިގެން ޓީޗަރުންނަށް ސިޔާސީ ގޮތުން ފިއްތުންތައް ކުރިމަތިކުރުމާއި، ވަކި ފިކުރެއްގެ ޓީޗަރުންނަށް ކުރިއެރުން ދިނުމާއި، ހިންގުން ބޮއްސުންލައިގެން ދިއުމުން ދަރިވަރުންގެ ކިޔެވުމަށް އަސަރުކުރުމާއި، މަޖީދިއްޔާ ސްކޫލުގެ ފަހުރުވެރިން ނަން ގެއްލިގެން ދިއުމާއި، ކޮރަޕްޝަންގެ ބައެއް ތުހުމަތުވެސް ކޮށްފައިވެ އެވެ.
ތައުލީމީ ދާއިރާއަށް ވަރަށް ގިނަ އަހަރުތަކަކު ހިދުމަތް ކުރައްވާފައިވާ އައިޝަތު ސޯލިހް މަޖީދިއްޔާ ސްކޫލުގެ ޕްރިންސިޕަލްގެ ގޮތުގައި ހުންނަވާތާ އަށެއްކަ އަހަރުވެއްޖެ އެވެ.