މުދައްރިސުންގެ ފަންނީ ގާބިލްކަން އިތުރުކުރުމަށްޓަކައި ރާއްޖޭގެ އެކި ސަރަހައްދުތަކުގައި "އެޑިއުކޭޝަން ސެންޓާ ފޯ އެކްސެލެންސް"ގެ ނަމުގައި ސެންޓަރުތަކެއް ގާއިމުކުރުމަށް ނިންމައިފި އެވެ.
ދައުލަތުގެ މީޑިއާގައި ވާހަކަދައްކަވަމުން އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވީ އަންނަ އަހަރު ތައުލީމީ ދާއިރާ އިން އެންމެ ބޮޑު އިސްކަމެއް ދޭނީ މުދައްރިސުންގެ ފަންނީ ގާބިލްކަން އިތުރުކުރުމަށް ކަމަށެވެ. ސެންޓަރުތަކެއް ގާއިމުކުރަން ނިންމާފައިވަނީ އެ މަސައްކަތްތަކަށް ފަސޭހަކޮށްދިނުމަށެވެ.
"މިތަނުން މުދައްރިސުންނަށް ބޭނުންވާ ޕްރޮފެޝަނަލް ޑިވެލޮޕްމަންޓާއި ޕްރިންސިޕަލުންނަށް ބޭނުންވާ ޕްރޮފެޝަނަލް ޑިވެލޮޕްމަންޓް ފޯރުކޮށްދޭނެ. އަދި ސްކޫލް އިވެލުއޭޝަންގެ މަސައްކަތްތައް މިއަށްވުރެ ހަރުދަނާ ވެގެންދާނެ،" މިނިސްޓަރު ވިދާޅުވި އެވެ.
އަންނަ އަހަރުގެ ބަޖެޓުގައި ތައުލީމީ ދާއިރާއަށް 6.1 ބިލިއަން ރުފިޔާގެ ބަޖެޓެއް ވަނީ ހާއްސަކޮށްފަ އެވެ.
މުދައްރިސުން ތަމްރީން ކުރުމަށްޓަކައި މިދިޔަ އޮކްޓޫބަރު މަހުގެ ތެރޭގައި ވަނީ ގައުމީ ފެންވަރުގެ ޕްރޮގްރާމެއްވެސް ފަށާފަ އެވެ. މި ޕްރޮގްރާމްގެ ދަށުން އަހަރަކު 150 މުދައްރިސުން ތަމްރީންކުރުމަށް މިނިސްޓްރީން ވަނީ ނިންމާފަ އެވެ.
އެޑިޔުކޭޝަން މިނިސްޓަރު މީގެކުރިން ވިދާޅުވި ގޮތުގައި ސަރުކާރުގެ ސްކޫލުތަކަށް އަދިވެސް 2،000 އަށް ވުރެ ގިނަ މުދައްރިސުން ބޭނުންވެ އެވެ.