ދަރިވަރުން ބައިވެރިކޮށްގެން ދައުލަތުގެ އެއްވެސް އިދާރާއަކުން ހަރަކާތެއް ހިންގާނަމަ ހުއްދަ ހޯދުމަށް އެޑިޔުކޭޝަން މިނިސްޓްރީން އަންގައިފި އެވެ.
މިކަމާ ގުޅޭ ސާކިއުލާއެއް އެޑިޔުކޭޝަން މިނިސްޓްރީން އިއްޔެގެ ވަގުތެއްގައި ވަނީ ސަރުކާރުގެ ހުރިހާ އިދާރާއަކާއި ސިޓީ އަދި ލޯކަލް ކައުންސިލްތަކާއި، ކްލަބް ޖަމިއްޔާ، ޖަމާއަތްތަކަށް ފޮނުވާފަ އެވެ.
ސްޓޭޓް މިނިސްޓަރު އަހްމަދު މުހައްމަދު ސޮއިކުރައްވާފައިވާ ސާކިއުލާގައި ބުނެފައިވަނީ ދަރިވަރުން ބައިވެރިކޮށްގެން ހިންގާ ހަރަކާތްތަކަކީ ދުރާލައި ރާވައިގެން އަދި ކޮންމެ އަހަރަކުވެސް ތައްޔާރުކުރާ އެކްޓިވިޓީ ކަލަންޑަރުގައި ހިމަނައިގެން ކުރިއަށް ގެންދާ ހަރަކާތްތަކެއް ކަމަށެވެ.
އެހެންވެ އެއްވެސް އިދާރާއަކުން ހިންގާ ހަރަކާތެއްގައިވެސް ދަރިވަރުން ބައިވެރިކުރާނަމަ އެކްޓިވިޓީ ކަލަންޑަރުގައި ހިމަނާފައި އޮންނަން ވާނެ ކަމަށްވެސް އަންގާފައިވެ އެވެ.
ސާކިއުލާގައި ބުނެފައިވަނީ ދަރިވަރުން ބައިވެރިކޮށްގެން ހަރަކާތެއް ހިންގަންވާނީ ކިޔެވުމަށް ބުރޫ ނާރާ ގޮތަށް ކަމަށެވެ. އަދި އެފަދަ ހަރަކާތްތަކަކީ ދިރާސީ އަހަރު ފެށުމުގެ ކުރިން މިނިސްޓްރީގެ ހުއްދަ ހޯދާފައިވާ ހަރަކާތަކަށް ވާންޖެހޭނެ ކަމަށްވެސް ބުންޏެވެ. ހަރަކާތެއްގައި ދަރިވަރުން ބައިވެރިކުރަން ސްކޫލުތަކާ މުއާމަލާތު ކުރަންވާނީ މިނިސްޓްރީގެ ހުއްދަ ލިބިގެން ކަމަށްވެސް ސާކިއުލާގައިވެ އެވެ.
އެޑިޔުކޭޝަން މިނިސްޓްރީން މިފަދަ އެންގުމެއް އަންގަންޖެހުނީ އެކްޓިވިޓީ ކަލަންޑަރުގައި ނުހިމަނާ އަދި މިނިސްޓްރީއާއި މަޝްވަރާ ކުރުމެއް ނެތި އިދާރާތަކުން ތަފާތު ހަރަކާތްތަކާއި މުބާރާތްތައް ބާއްވާތީ ކަމަށްވެސް ސާކިއުލާގައި ފާހަގަކޮށްފައިވެ އެވެ. އެކްޓިވިޓީ ކަލަންޑަރުގައި ނުހިމަނައި ދަރިވަރުންނާ ގުޅޭ ހަރަކާތްތައް ކުރިއަށް ގެންދިއުމުން ދަރިވަރުންގެ ކިޔެވުމަށާއި ޓީޗަރުންނާއި ދަރިވަރުންގެ ނަފްސާނީ އަދި ޖިސްމާނީ ދުޅަހެޔޮކަމަށް އަސަރު ކުރާ ކަމަށްވެސް ބުންޏެވެ.
މީގެއިތުރުން ކުއްލިއަކަށް ރާވާ ހަރަކާތްތަކާ ގުޅިގެން ސްކޫލްތަކާއި ބެލެނިވެރިންނަށް އެކަމަކީ މާލީ ބުރައަކަށްވެ، ނުތަވަސްކަން އުފެދޭ ކަމަށްވެސް ސާކިއުލާގައި ބުނެފައިވެ އެވެ.