އަރަބިއްޔާ ސްކޫލުގެ އާ އިމާރާތުގެ މަސައްކަތް ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑް (އާރްސީސީ) އާ ހަވާލުކޮށް އަމަލީ މަސައްކަތް މިއަދު ފަށައިފި އެވެ.
އެޑިއުކޭޝަން މިނިސްޓްރީން ބުނި ގޮތުގައި އެ މަޝްރޫއު އެ ކުންފުންޏާ ހަވާލުކުރީ 18 މަސް ތެރޭގައި ނިންމާ ގޮތަށް 152.9 މިލިއަން ރުފިޔާ އަށެވެ.
އެ މިނިސްޓްރީން ބުނި ގޮތުގައި މި ސްކޫލުގައި 40 ކްލާސްރޫމާއި، ބޭސްމެންޓްގައި އަންޑަ ގްރައުންޑް ޕާކިންގް ޒޯނަކާއި، ޓާފް ދަނޑެއް ހިމެނޭނެ އެވެ. މީގެ އިތުރުން މި ސްކޫލު ޢިމާރާތްކުރަނީ ޒަމާނީކޮށް، އޭސީ އަދި ސޯލާ ޕެނަލް ހަރުކުރެވޭނެ ގޮތަށް ކަމަށްވެސް އެ މިނިސްޓްރީން ބުނެ އެވެ.
އަރަބިއްޔާ ސްކޫލުގެ އާ އިމާރާތް، ބާ ޖަމާލުއްދީން ހުރި ބިމުގައި އިމާރާތްކުރަން ކުރީގެ ރައީސް އިބްރާހީމް މުހައްމަދު ސޯލިހްގެ ސަރުކާރުގައި އަމިން ކޮންސްޓްރަކްޝަންއާ ހަވާލުކުރީ ސެޕްޓެމްބަރު 2022 ގަ އެވެ. އެ މަޝްރޫއު ހަވާލުކުރީ 168.5 މިލިއަން ރުފިޔާ އަށެވެ.
ނަމަވެސް ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު މާލޭގެ ކުރީގެ ކުނި ކޮށި ހިންގި ބިމުގައި އަރަބިއްޔާ ސްކޫލުގެ އާ އިމާރާތް އަޅަން ނިންމާ ސްކޫލުގެ ޑިޒައިނަށް ބަދަލު ގެނަ އެވެ.
މަޝްރޫއުގެ ސްކޯޕަށް ބަދަލު އައުމުން އަމިން ކޮންސްޓްރަކްޝަން އިން ފުރަތަމަ ހުށަހެޅީ 237 މިލިއަން ރުފިޔާ ކަމަށް އެޑިއުކޭޝަން މިނިސްޓްރީން ބުންޏެވެ. ސްޕޯޕް ރިވައިސްކޮށް އެ ކުންފުނިން ފަހުން ހުށަހެޅީ 235 މިލިއަން ރުފިޔާ އެވެ. އެ އަގު ބޮޑުވުމުން އެއްބަސްވުން ވަނީ ބާތިލުކޮށްފަ އެވެ.