ސްކޫލްތަކުގެ ދެވަނަ ޓާމްގެ މިޑް ބްރޭކްއަށްފަހު ކިޔެވުން އަލުން ފަށައިފި އެވެ.
މިޑް ޓާމް ބްރޭކްއަށް ދަރިވަރުން ޗުއްޓީއަށް ދިޔައީ މިދިޔަ މަހުގެ 22 ވަނަ ދުވަހު އެވެ. ދެވަނަ ޓާމްގެ ކިޔެވުން މާޗް ހަ ވަނަ ދުވަހާއި ހަމައަށް ކުރިއަށްދާއިރު ދިރާސީ އާ އަހަރުގެ ކިޔެވުން ފަށާނީ އެޕްރީލް ހަ ވަނަ ދުވަހު އެވެ.
އެޑިއުކޭޝަން މިނިސްޓްރީން އާންމުކޮށްފައިވާ ކަލަންޑަރުގައިވާ ގޮތުން މި އަހަރުގެ ފުރަތަމަ ޓާމްގައި ދަރިވަރުން 85 ދުވަހު ކިޔަވާފައިވެ އެވެ. އަދި ދެވަނަ ޓާމްގައި 105 ދުވަހު ކިޔަވާނެ އެވެ.
ހިނގަމުންދާ ދިރާސީ އަހަރުގެ ކިޔެވުން ފެށީ 96،000 ދަރިވަރުންނާއެކު އެވެ. އެގޮތުން ސަރުކާރުގެ 217 ސްކޫލުގައި 83،000 އެއްހާ ދަރިވަރުން އަދި ޕްރައިވެޓް ސްކޫލުތަކުގައި 13،000 ދަރިވަރުން ދަނީ ކިޔަވަމުންނެވެ.
ދިރާސީ އާ އަހަރުގެ ކިޔެވުން 2026 ވަނަ އަހަރުން ފެށިގެން ޖެނުއަރީގައި ފަށާ ގޮތަށް ސަރުކާރުން ވަނީ ނިންމާފަ އެވެ. ދިރާސީ އަހަރުގެ ކިޔެވުން ޖެނުއަރީގައި ފަށާ ގޮތަށް ހެދުމަކީ ރައީސް ޑރ. މުއިއްޒުގެ ރިޔާސީ ވައުދެކެވެ.