ހއ. ދިއްދޫގައި ލޮނު އުފައްދާ ފެކްޓްރީއެއް އެޅުމުގެ މަސައްކަތް ފަށައިފި އެވެ.
މި މަޝްރޫއު ކުރިއަށް ގެންދަނީ އެމްޑީޕް އިންވެސްޓްމަންޓް ކިޔާ ދިވެހި ކުންފުންޏަކާއި ޖަޕާނުގެ ކުންފުންޏެއް ގުޅިގެންނެވެ.
ފެކްޓަރީ އަޅަނީ ދިއްދޫ ކައުންސިލުން 15 އަހަރަށް ކުއްޔަށް ދޫކޮށްފައިވާ 15,000 އަކަފޫޓުގެ ބިމެއްގައެވެ.
ކައުންސިލުން ބުނާ ގޮތުގައި މި މަޝްރޫއުގެ ސަބަބުން ކައުންސިލަށް އާމްދަނީ އިތުރުވެ، ރަށުގައި ގިނަ ވަޒީފާގެ ފުރުސަތުތަކެއް ހުޅުވިގެންދާނެ އެވެ.
ފެކްޓަރީން އުފައްދާނީ ތިން ބާވަތެއްގެ ލޮނެވެ. މީގެތެރޭގައި އާންމު ކެއުމަށް ބޭނުންކުރާ ލޮނާއި، ހާއްސަ ބާވަތްތަކުގެ ލޮނު އަދި މަސް ތައްޔާރުކުރުމަށް ބޭނުންކުރާ ލޮނު ހިމެނެ އެވެ.
މި އުފެއްދުންތައް ރާއްޖޭގެ ރިސޯޓުތަކަށާއި މީހުން ދިރިއުޅޭ ރަށްތަކަށް ވިއްކުމަށް ވަނީ ރާވާފަ އެވެ.
ފެކްޓްރީގެ މަސައްކަތުގެ 20 ޕަސަންޓް މިހާރު ވަނީ ނިންމާފަ އެވެ. ކުންފުނިން އަމާޒުކުރަނީ މި އަހަރުގެ ނިޔަލަށް ފެކްޓަރީގެ މަސައްކަތް ނިންމާ، ލޮނު އުފައްދަން ވީހާވެސް އަވަހަަށް ފާށށެވެ.
މި މަޝްރޫއު ކާމިޔާބުވެއްޖެނަމަ، ރާއްޖޭގެ އެހެން ސަރަޙައްދުތަކުގައި އިތުރު 4 ފެކްޓްރީ އެޅުމަށްވެސް ކުންފުނިން ވަނީ ރާވާފަ އެވެ.
ރާއްޖޭގެ ކަނޑުގެ ލޮނުގެ ކޮލިޓީ ޖަޕާނުން މީގެ ކުރިން ވަނީ ބަލާފަ އެވެ. ނަތީޖާއިން ދައްކާގޮތުގައި ރާއްޖޭގެ ކަނޑުގެ ލޮނަކީ އެހެން ގައުމުތަކާ އަޅާބަލާއިރު ކޮލިޓީ ރަނގަޅު، ސިއްހަތަށް ފައިދާހުރި މާއްދާތައް ގިނަ ލޮނެކެވެ. މިއީ ރާއްޖޭގައި މިފަދަ ފެކްޓްރީއެއް ގާއިމުކުރެވޭ ފުރަތަމަ ފަހަރެވެ.