ޓޫރިޒަމް ދާއިރާގެ ޖީއެސްޓީ ނުވަތަ ޓީޖީއެސްޓީ ރޭޓަށް ބަދަލު ގެނައުމަށް ނިންމާފައިވާތީ ފަތުރުވެރިކަމުގެ ދާއިރާގައި ހިދުމަތްތައް ދޭ ފަރާތްތަކުން އެކަމަށް ދުރާލާ ތައްޔާރުވުމަށް އިލްތިމާސްކޮށްފި އެވެ.
ކޮމިޝަނާ ޖެނަރަލް އޮފް ޓެކްސޭޝަން ހަސަން ޒަރީރު ސޮއިކުރައްވައި ނެރުއްވާފައިވާ ސާކިއުލާގައި ވަނީ މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް ގެނައި ހަތްވަނަ އިސްލާހުގެ ދަށުން ކުރިއަށް އޮތް 2025 ވަނަ އަހަރުގެ ޖުލައި އެއްވަނަ ދުވަހުން ފެށިގެން ޓޫރިޒަމް ދާއިރާގެ ޖީއެސްޓީ ރޭޓް 17 ޕަސަންޓަށް ބޮޑުވާނެ ކަން ހަނދާންކޮށްދީފަ އެވެ.
"ވީމާ 1 ޖުލައި 2025 އިން ފެށިގެން އާ ރޭޓުގައި ޖީއެސްޓީ ނެގުމަށްޓަކައި ސިސްޓަމްތަކަށް ގެންނަންޖެހޭ ބަދަލުތައް ގެނައުމަށާއި، ޓޫރިޒަމް ދާއިރާގެ މުދަލާއި ހިދުމަތުގައި އެ ތާރީހުން ފެށިގެން އާ ރޭޓުތައް ހިމަނައިގެން އަގު ޖެހުމަށްޓަކައި ކުރަންޖެހޭ ކަންތައްތައް ދުރާލައި ރާވައިގެން ކުރިއަށް ގެންދިއުމަށް ދަންނަވަމެވެ،" ސާކިއުލާގައިވެ އެވެ.
މީރާ އިން ވަނީ ޓޫރިޒަމް ދާއިރާގެ ޖީއެސްޓީއަށް ރަޖިސްޓަރީކޮށްފައިވާ ފަރާތަކީ 24 ގަޑިއިރުގެ އުސޫލުން ވިޔަފާރިކުރާ ފަރާތެއް ކަމުގައިވާނަމަ ޖުލައި އެއްވަނަ ދުވަހުން ފެށިގެން ޓޫރިޒަމް ދާއިރާގެ ޖީއެސްޓީ ނަގަންވާނީ އާ ރޭޓުގައި ކަމަށްވެސް އަންގާފަ އެެވެ.
އަންނަ އަހަރުގެ ޖުލައި އެއްވަނަ ދުވަހުގެ ނިޔަލަށް ޓޫރިޒަމް ދާއިރާގެ ޖީއެސްޓީ ރޭޓަކީ 16 ޕަސަންޓެވެ.