ދިވެހި ވިޔަފާރިތަކަށް ފުރުސަތު ފަހިކޮށްދިނުމަށްޓަކައި "އުނގުޅޭ ބާޒާރު" އެނބުރި އަންނަން ތައްޔާރުވެއްޖެ އެވެ.
ދިވެހިންގެ މެދުގައި ބޮޑު މަގުބޫލު ކަމެއް ކުރިން ހޯދާފައިވާ މަޝްހޫރު ވިޔަފާރީގެ އީދު އަލުން އެ ނަމުގައި އެނބުރި މިއަންނަނީ އަހަރުތަކަކަށްފަހު އެވެ.
މި ހަރަކާތް އިންްތިޒާމު ކުރަނީ 2019 ވަނަ އަހަރު އަލިމަސް ކާނިވަލުގައި "ރަންބޮލި މަހާސަމާ" ނައިޓް މާކެޓް އިންތިޒާމުކުރި ޓީމުންނެވެ.
އެ ޓީމްގެ ސޭލްސް ޑިރެކްޓަރު ހަސަން ޝިފާން "އަވަސް" އަށް ވިދާޅުވި ގޮތުގައި އުގުޅޭ ބާޒާރު ކުރިއަށްދާނީ ކުރިއަށް އޮތް ޖެނުއަރީ 4 އިން 11 ގެ ނިޔަލަށް ހުޅުމާލޭގެ ފުރަތަމަ ފިޔަވަހީގެ ރުއްގަނޑު 2 ގައި ކޮންމެ ދުވަހަކު ހަވީރު 4:00 އިން ރޭގަނޑު 12:00ގެ ނިޔަލަށެވެ.
މި ބާޒާރުގައި ޖުމްލަ 150 ސްލޮޓް ދޫކުރާއިރު ސްޓޭޑަޑް ސްލޮޓެއްގެ އަގަކީ 7،200 ރުފިޔާ އެވެ. ޕްރިމިއަމް ސްލޮޓެއްގެ އަގަކީ 7،999 ރުފިޔާ އެވެ.
ސްލޮޓްތަކަށް އެދުމުގެ ފުރުސަތު ހުޅުވާލާފައިވާއިރު 7372518 އަށް ގުޅުމުން އިތުރު މައުލޫމާތު ލިބޭނެ ކަމަށް ޝިފާން ވިދާޅުވި އެވެ.
މީގެ އިތުރުން މި ބާޒާރުގައި ވިޔަފާރިތަކަށް އިޝްތިހާރުކުރުމުގެ ފުރުސަތުވެސް ލިބޭނެ ކަމަށް އޭނާ ވިދާޅުވި އެވެ.
އުނގުޅޭ ބާޒާރު ފަށާ ރޭ ހަވާ އެރުވުމަށް ނިންމާފައިވާއިރު ބާޒާރު ކުރިއަށްދާ ދުވަސްތަކުގައި ކުޑަކުދިންގެ ކުޅިވަރު ސްޓޯލްތަކެއް ބެހެއްޓުމަށްވެސް ވަނީ ހަމަޖެހިފަ އެވެ. އަދި ބައެއް ރޭރޭ ބޮޑުބެރާއި މިއުޒިކް ޝޯވެސް ބޭއްވުމަށް ވަނީ ހަމަޖެހިފަ އެވެ.