ގައުމީ ސަލާމަތާ ގުޅޭ ދާއިރާތަކުގެ މަޝްރޫއުތަކާއި މަސައްކަތްތައް ބިޑަކާ ނުލައި އެ މަޝްރޫއުތައް ހިންގުމަށް ނޭޝަނަލް ސެކިއުރިޓީ ކައުންސިލަށް އިތުރު ބާރުތަކެއް ދީފި އެވެ.
ދައުލަތުގެ މާލިއްޔަތު ގަވައިދުގެ އިސްލާހުތައް މިއަދު އާންމުކުރިއިރު ގަވައިދުގެ 10.20 ވަނަ މާއްދާގެ (ރ) މިހާރު އޮތް ގޮތުން ސިންގަލް ސޯސް ޕްރޮކިއުމަންޓް ނުވަތަ ބިޑެއް ހުށަހަޅާފައި ނެތް ނަމަވެސް ވަކި ހާއްސަ ފަރާތަކަށް މަޝްރޫއު ހަވާލުކުރުމުގެ ބާރު ނޭޝަނަލް ސެކިއުރިޓީ ކައުންސިލަށް ލިބެ އެވެ.
މާލިއްޔަތު ގަވައިދު ކުރިން އޮތް ގޮތުން މަޝްރޫއުތައް ހަވާލުކުރެވޭނީ ސަރުކާރުގެ މެޖޯރިޓީ ހިއްސާ އޮންނަ ކުންފުނިތަކަށާއި ފުލުހުންނާއި ސިފައިންގެ ކޯޕަރޭޓިވް ސޮސައިޓީތަކަށް އެކަންޏެވެ. އެކަމަކު ގަވައިދު މިއަދު އިސްލާހުކުރިއިރު ގަވައިދުން ވަނީ މިބައިތައް އުނިކޮށްފަ އެވެ.
މާލިއްޔަތު ގަވައިދުގެ 10.49 ވަނަ މާއްދާގެ (ރ) މިހާރު އޮތް ގޮތުން ނޭޝަނަލް ސެކިއުރިޓީ ކައުންސިލުން ހަވާލުކޮށްފައިވާ މަޝްރޫއެއްގެ އަގަށާއި މުއްދަތަށް ބަދަލު ގެނައުމަށާއި އަދި އެއްބަސްވުމެއް އުވާލަން ބޭނުންވެއްޖެނަމަ އެ ބާރު ނޭޝަނަލް ސެކިއުރިޓީ ކައުންސިލަށް ލިބެ އެވެ. ގަވައިދުގައި ކުރިން އޮތީ މަޝްރޫއުތަކުގެ އަގާއި މުއްދަތު ކަނޑައެޅުމާއި އަދި އެއްބަސްވުން އުވާލުމުގެ ބާރު މަޝްރޫއު ހަވާލުކުރާ މިނިސްޓްރީއަކަށް ލިބޭ ގޮތަށެވެ.
ބިޑަކާ ނުލައި މަޝްރޫއުތައް ހިންގުމަށް ނޭޝަނަލް ސެކިއުރިޓީ ކައުންސިލަށް އިތުރު ބާރުތަކެއް ދިންއިރު ބިޑްކޮށްގެން ހަވާލުކުރާ މަޝްރޫއުތަކުގެ އިވެލުއޭޝަން މަރުހަލާ ކުރިއަށްދާ ގޮތާ މެދު އާންމުން އަބަދުވެސް ސުވާލު އުފައްދަ އެވެ.