ނ. ހޮޅުދޫ، މާރަނގަ، ޒަކިއްޔާ މޫސާ މަނިކު (50އ) މަރުވި މައްސަލަ އިތުރު ތަހުގީގުކުރުމަށް އޭނާގެ ހަށިގަނޑު މާލެ ގެނެސްފި އެވެ.
ފުލުހުން ބުނި ގޮތުގައި ޒަކިއްޔާގެ ހަށިގަނޑު މާލެ ގެނައީ ރޭގެ ދަންވަރުގެ ވަގުތެއްގައެވެ.
ޒަކިއްޔާގެ މަރުގެ ތުހުމަތުގައި އަދި މިހާތަނަށް އެއްވެސް މީހަކު ހައްޔަރުކޮށްފައެއް ނުވެ އެވެ.
ފުލުހުން ބުނި ގޮތުގައި ހޮޅުދޫގެ ގެއެއްގައި ޒަހަމްތަކަކާއެކު އަންހެނަކު އޮތް ކަމުގެ ރިޕޯޓް އެ އިދާރާއަށް ލިބުނީ އިއްޔެ ހެނދުނު 10:10 ހާއިރުއެވެ.
ޒަކިއްޔާގެ މަރުގެ މައުލޫމާތު ލިބިގެން ފުލުހުން އެތަނަށް ގޮސް އޭނާގެ ހަށިގަނޑު ހެލްތު ސެންޓަރަށް ގެންދިޔަ ކަމަށާއި އޭރުވެސް އޭނާ މަރުވެފައިވާ ކަމަށް ހެލްތު ސެންޓަރާ ހަވާލާދީ ފުލުހުން ބުނެ އެވެ.
ޒަކިއްޔާގެ މަރުގެ މައްސަލަ ތަހުގީގުކުރުމަށް ފުލުހުންގެ ހާއްސަ ޓީމެއް އިއްޔެ ހޮޅުދޫއަށް ދިޔަ އެވެ. އެ ޓީމު އަދިވެސް ހޮޅުދޫގައި އެބަތިއްބެވެ.
ޒަކިއްޔާ މަރުވި ގޮތެއް އަދި ސާފުވެފައި ނުވާއިރު އޭނާގެ ހަށިގަނޑު ފެނުނުއިރު އެތަނުގައި ވަޅިއެއް އޮތް ކަމަށް އެ ރަށުން އަވަސްއާ ވާހަކަދެއްކި ބައެއް މީހުން ބުނެފައިވެ އެވެ.
ޒަކިއްޔާ އަކީ ނަފްސާނީ ބަލި ތަހައްމަލް ކުރާ މީހެއް ކަމަށް މައުލޫމާތު ލިބިފައިވީ ނަމަވެސް އެކަމުގައި ހޮޅުދޫ އެކި މީހުންގެ ވާހަކަ ހުރީ އެކި ގޮތަށެވެ. އެއް ބަޔަކު ބުނީ ޒަކިއްޔާ ނަފްސާނީ ބަލި ތަހައްމަލް ކުރާކަން ނޭނގޭ ކަމަށާއި އޭނާއަކީ އެންމެންނާވެސް ގުޅޭ ހިތްހެޔޮ މީހެއް ކަމަށެވެ.
ޒަކިއްޔާ ދިރިއުޅޭ ގޭގެ ބަދިގެ ފަރާތުގައި ހުންނަ ގުދަނެއް ކައިރީގައި އޭނާ މަރުވެފައި އޮއްވާ ފެނުނީ އެ ގެއަށް ކުނި ނަގަން ދިޔަ ބިދޭސީންތަކަކަށް ކަމަށް އެނގިފައިވެ އެވެ.
ޒަކިއްޔާ އަކީ މިދިޔަ އަހަރު އުމުރާގެ އަޅުކަން އަދާކޮށްފައިވާ ތަނަވަސް އާއިލާއެއްގެ މީހެއް ކަމަށް ހޮޅުދޫ މީހުން ބުނެ އެވެ.
ޒަކިއްޔާ މަރުވިއިރު ފިރިއަކާއި ދެ ކުދިންނާއި މަމަ ދަރިއަކު ހުރެ އެވެ. ޒަކިއްޔާއާ އެކު އެއް ގެއެއްގައި އެއް ދަރިއަކު ދިރިއުޅެ އެވެ.