ހޯމްލޭންޑް ސެކިއުރިޓީ މިނިސްޓްރީގެ ޕާމަނަންޓް ސެކްރެޓްރީގެ މަގާމުން މިދިޔަ ބުރާސްފަތި ދުވަހު އިސްތިއުފާ ދެއްވި ހިންނާ ހާލިދު، ފޮރިން މިނިސްޓްރީގެ ޑެޕިއުޓީ މިނިސްޓަރުގެ މަގާމަށް އައްޔަންކުރައްވައިފި އެވެ.
ހިންނާއަށް ޑެޕިއުޓީ މިނިސްޓަރުކަން ދެއްވީ އިއްޔެގެ ވަގުތެއްގައި ކަމަށް އަވަސްއަށް އެނގިފައިވެ އެވެ.
ހޯމްލޭންޑް ސެކިއުރިޓީ މިނިސްޓްރީގެ ޕީއެސްގެ މަގާމަށް މިދިޔަ ޖޫން މަހުގެ ހަވަނަ ދުވަހު އައްޔަންކުރި ހިންނާ އެ މަގާމުން އިސްތިއުފާ ދެއްވި ވަކި ސަބަބެއް މިއަދާ ހަމައަށްވެސް ހާމަކުރައްވާފައެއް ނުވެ އެވެ.
ހިންނާ މީގެކުރިން ވަނީ ރައީސް އޮފީހުގެ އަންޑާ ސެކެޓްރީގެ މަގާމާއި މާލޭ ސިޓީ ކައުންސިލްގެ ޒިންމާދާރު އިސްވެރިޔާގެ މަގާމުވެސް އަދާކުރައްވާފަ އެވެ.
ރައީސް އޮފީހުގެ ވެބްސައިޓްގައި އާންމުކޮށްފައިވާ މައުލޫމާތުތަކަށް ބަލާއިރު ފޮރިން މިނިސްޓްރީގައި ހިންނާއާ އެކު ފަސް ޑެޕިއުޓީ މިނިސްޓަރުން ތިއްބަވާނެ އެވެ.