މިދިޔަ އަހަރު އެންޓި ކޮރަޕްޝަން ކޮމިޝަން (އޭސީސީ)އަށް 832 މައްސަލަ ހުށަހެޅި ކަމަށް އެ ކޮމިޝަނުން ބުނެފި އެވެ. އޭސީސީއިން ވަނީ އެ ކޮމިޝަނުގެ އަހަރީ ރިޕޯޓް މިއަދު ނެރެފަ އެވެ.
އަހަރީ ރިޕޯޓުން ދައްކާ ގޮތުގައި 832 މައްސަލަ އޭސީސީއަށް ވަނީ ހުށަހަޅާފަ އެވެ. އަދި އޭގެ ތެރެއިން 611 މައްސަލަ އެ ކޮމިޝަނުން ނިންމާފައިވެ އެވެ. އެކިއެކި ސަބަބުތަކާހުރެ 137 މައްސަލައެއް އެ ކޮމިޝަނުން ވަނީ ނުބަލާ ދޫކޮށްލާފަ އެވެ.
މިދިޔަ އަހަރު އޭސީސީއަށް އެންމެ ގިނައިން ހުށަހަޅާފައިވަނީ، ޕްރޮކިއުމެންޓާ ގުޅޭ މައްސަލަތަކެވެ. އެގޮތުން ވަޒީފާއާ ގުޅޭގޮތުން 150 މައްސަލަ ހުށަހަޅާފައިވާއިރު ކުއްޔަށް ދޭ ތަންތަނާއި ބިންބިމާ ގުޅޭގޮތުން 60 މައްސަލައެއް އެ ކޮމިޝަނަށް ހުށަހަޅާފައިވެ އެވެ.
އަހަރީ ރިޕޯޓް ނެރުމަށް މިއަދު ބޭއްވި ރަސްމިއްޔާތުގައި އެ ކޮމިޝަނުގެ ރައީސް ހަސަން ލުތުފީ ވިދާޅުވީ މި އަހަރުގެ ތެރޭގައި ނަޒާހަތްތެރިކަމުގެ ގައުމީ ޕްލޭން ލޯންޗުކުރެވިގެންދާނެ ކަމަށެވެ. އެ ޕްލޭން ލޯންޗްކުރެވުމާއެކު ދައުލަތުގެ ކޮރަޕްޝަން ހުއްޓޭނެ ކަމަށް ވިދާޅުވި އެވެ.
ލުތުފީ ވިދާޅުވީ، މިދިޔަ އަހަރު އެ ކޮމިޝަނުން ވަނީ ކޮރަޕްޝަނާ ދެކޮޅަށް ގިނަ މަސައްކަތްތަކެއް ކޮށްފައި ކަމަށާއި މި އަހަރުގެ ވެސް ކޮރަޕްޝަނާ ދެކޮޅަށް މަސައްކަތްތަކެއް ކުރާނެ ކަމަށެވެ.
މީގެއިތުރުން މި އަހަރުގެ ތެރޭގައި ކޮމިޝަނަށް މައްސަލަ ހުށަހަޅާ ފަރާތްތަކަށް ރައްކާތެރި ލިބޭނެ ގަވާއިދެއް ވެސް އެކުލަވާލާނެ ކަމަށް ލުތުފީ ވިދާޅުވި އެވެ. އެ ގަވައިދުގެ ބޮޑު ބައި ނިމި، ވަރަށް އަވަހަށް ގެޒެޓްކުރާނެ ކަމަށް ވިދާޅުވި އެވެ.
ކޮރަޕްޝަން ހުއްޓުވުމަށް އޭސީސީއިން ކުރަމުންދާ މަސައްކަތަށް އެއްވެސް ފަރާތެއް ނުފޫޒެއް ނުފޯރާ ކަމަށާއި އެ މަސައްކަތަށް ސަރުކާރުގެ ވަރަށް ބޮޑު އެއްބާރުލުމެއް ލިބޭ ކަމަށް ވެސް އޭސީސީގެ ރައީސް ވިދާޅުވި އެވެ.
އެންޓި ކޮރަޕްޝަން ކޮމިޝަން