ދިވެހިރާއްޖޭގައި އިސްލާމްދީނުގެ ނޫރު ދަމަހައްޓައި އިސްލާމީ ހިދާޔަތު ފެތުރުމަށް އެހީތެރިވުމަކީ ރައީސް ޑރ. މުހައްމަދު މުއިއްޒުގެ ވަރަށް ބޮޑު އިސްކަމެއް ދެއްވާ ކަމެއް ކަމުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މިނިސްޓަރު ޝަހީމް މިހެން ވިދާޅުވީ ރާއްޖޭގެ އެކި ސަރަހައްދުގައި ހަރަކާތްތެރިވާ ދީނީ އިޖުތިމާއީ ޖަމިއްޔާތަކާއެކު ކުރިއަށް ގެންދިޔަ ޖަމިއްޔާތަކުގެ އަހަރީ ބައްދަލުވުމުގައެވެ.
ޝަހީމް ވިދާޅުވީ ރައީސް މުއިއްޒުގެ ސަރުކާރަކީ އިސްލާމްދީނުގެ ކަންކަމަށް ވަރަށް ބޮޑު އަހައްމިއްޔަތު ކަމެއްދޭ ދީނަށް ހުރުމަތްތެރިކޮށް ހިތާ ސަރުކާރެއް ކަމަށެވެ.
"ދީނާ ގުޅުންހުރި ކަންކަން ރާއްޖޭގައި ނަގަހައްޓައި ދެމެހެއްޓުމަށް ވަރަށް މުހިއްމު އިސްކަމެެއް ރައީސް ދެއްވާ،" ޝަހީމް ވިދާޅުވި އެވެ.
މިނިސްޓަރު ވިދާޅުވީ ދީނީ އިޖުތިމާއީ ޖަމިއްޔާތަކުން ކުރަމުންދާ މަސައްކަތްތަކަށް ދައުލަތުގެ ފުދުންތެރިކަން ހުރި މިންވަރަކުން މާލީ ގޮތުންނާއި، އެހެނިގެން ގޮތްގޮތުންވެސް ސަރުކާރުން އެހީވާނެ ކަމަށެވެ.
މި ބައްދަލުވުމުގައި ރާއްޖޭގެ 70 ޖަމިއްޔާއަކުން 98 މަންދޫބުން ބައިވެރިވި އެވެ. މީގެތެރޭގައި އޮންލައިންކޮށް ބައިވެރިވި ބައެއް ފަރާތްތައްވެސް ހިމެނެ އެވެ.
މި ބައްދަލުވުމުގެ ތެރެއިން ރާއްޖޭގެ ދައުވަތުގެ މައިދާނުގައި ހަރަކާތްތެރިވާ ބައެއް ބޮޑެތި ޖަމިއްޔާތަކުގެ މަސައްކަތްތައް ކުރިއަށްދާ ގޮތް ހިއްސާކުރުމާއި، ޖަމިއްޔާތަކުން ދައުވަތުގެ ކަންކަމުގައި ހިޔާލު ހުށަހެޅުމުގެ ފުރުސަތުވެސް ދީފައިވެ އެެވެ.