އިމާމުން އިތުރަށް ތަމްރީންކުރުމަށް ކުރާ މަސައްކަތްތަކުގެ ދަށުން މިހާތަނަށް 804 އިމާމުން ތަމްރީނުކޮށްފި އެވެ.
އިސްލާމިކް މިނިސްޓްރީން ކުރިއަށް ގެންދާ މި މަޝްރޫއަކީ މުޅި ރާއްޖެ 11 ސަރަހައްދަކަށް ބަހާލައިގެން ކުރިއަށް ގެންދާ މަޝްރޫއެކެވެ.
މި ޕްރޮގްރާމުގައި މައިގަނޑު ނުވަ ކަމެއް ނުވަތަ ނުވަ މޮޑިއުލެއް އިމާމުންނަށް ކިޔަވައިދެ އެވެ. މީގެތެރޭގައި ގުރުއާނާއި، ތަފްސީރާއި، ފިގުހާއި، ތަޖުވީދުގެ އިލްމާއި، ހަދީސްގެ އިތުރުން އަގީދާގެ އިލްމު ފަދަ މާއްދާތައް ހިމެނެ އެވެ.
އިސްލާމިކް މިނިސްޓްރީން ބުނީ މި ޕްރޮގްރާމުގެ ތެރެއިން އިމާމެއްގެ ޝަހްސިއްޔަތު ބިނާކުރުމަށްޓަކައި ބޭނުންވާނެ ވަރަށް ގިނަ މައުލޫމާތު ލިބޭނެ ކަމަށެވެ. އަދި މިސްކިތްތައް ބެލެހެއްޓުމުގައި އިމާމުންގެ ދައުރާ ގުޅޭ ގޮތުން ހާއްސަ މައުލޫމާތުތަކެއް ހިއްސާކުރަމުންދާ ކަމަށްވެސް ބުންޏެވެ.
އިސްލާމިކް މިނިސްޓްރީން މިއަހަރަށް ކަނޑައަޅާފައި އޮތީ ޖުމްލަ 700 އިމާމުން ތަމްރީން ކުރުމަށެވެ. ނަމަވެސް އަހަރު ނިމުމުގެ ކުރިން އެ އަދަދަށް ވުރެ އިތުރަށް އިމާމުން ތަމްރީންކޮށްފައިވެ އެވެ.