ރާއްޖެއިން ބޭރުގައި އަދި ރާއްޖޭގައި ކިޔަވާ ދަރިވަރުންނަށް ސަރުކާރުން ދޭ ފައިސާ ދިނުން ހުއްޓާ ނުލާ ކަމަށް ހަޔާ އެޑިއުކޭޝަން މިނިސްޓާރު ޑރ. މަރިޔަމް މާރިޔާ ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގަައި ވާހަކަދައްކަވަމުން މިނިސްޓަރު ވިދާޅުވީ އެ ފައިސާ ދިނުން ލަސްވި ނަަމަވެސް ފައިސާ ދިނުން ހުއްޓާލާފައި ނުވާ ކަމަށެވެ. އަދި ދަރިވަރުންނަށް ސަރުކާރުން ދެރަގޮތެއް ނުހަދާނެ ކަމަށްވެސް ވިދާޅުވި އެވެ.
"ރައްޔިތުން ބޭނުންވި އަވަސްމިނުގައި ފައިސާ ދޫކުރެވެންނެތް ނަމަވެސް އެކަމަށް ހުއްޓުމެއް ގެނެވިފައެއް ނުވޭ،" މާރިޔާ ވިދާޅުވި އެވެ.
މިނިސްޓަރު ވިދާޅުވީ މަތީ ތައުލީމާއި، ސްކޮލާޝިޕް އަދި ރާއްޖޭގައި ފުރަތަމަ ޑިގްރީ ހާސިލުކުރާ ދަރިވަރުންނަށް ހަރަދުކުރާނީ ސަރުކާރުން ކަމަށެވެ.
މިނިސްޓަރު އިތުރަށް ވިދާޅުވީ މީގެތެރެއިން ލޯނުގެ ފައިސާ ކުދިންނަށް ދިނުން ލަސްވަނީ ދަރިވަރުން ހުށަހަޅަންޖެހޭ ލިޔެކިޔުންތައް ފުރިހަމަ ނުވާތީ ކުރިމަތިވާ ގޮންޖެހުންތަކުގެ ސަބަބުން ކަމަށެވެ. އެގޮތުން އިދާރީ ގޮތުން ދިމާވާ ދަތިތަކާއި، ލޯނަށް ބޭނުންވާ އަދަދު އެނގޭނެ ގޮތަށް ލިޔެކިޔުން ހުށަނޭޅުމުންވެސް ދަތިތައް ދިމާވާ ކަމަށް ވިދާޅުވި އެވެ.
މާރިޔާ ވިދާޅުވީ ލޯނު ދިނުމުގައި ދިމާވާ ދަތިތައް ހައްލުކުރުމަށްޓަކައި ޑިޖިޓަލް ސިސްްޓަމެއް ގާއިމުކޮށް މިހާރަށް ވުރެ ހަލުވިކޮށް ލޯނު ދޫކުރުމަށް މަސައްކަތް ކުރަމުންދާ ކަމަށެވެ.
މިނިސްޓަރު އިތުރަށް ވިދާޅުވީ ލޯނަށް މިދިޔަ އަހަރު ހޮވިފައިވާ ދަރިވާރުންނާއި، މިއަހަރު ހޮވިފައިވާ ދަރިވަރުންނާއި، ލޯނުގައި މިހާރު ކިޔަވަމުން ގެންދާ ދަރިވަރުންނަށް މިއަހަރުގެ މިހާތަނަށް 473 މިލިއަނަށް ވުރެ ގިނަ ރުފިޔާ ދޫކޮށްފައިވާ ކަމަށެވެ.