ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ މުވައްޒަފުންނަށް ފުރިހަމަ މުސާރަ ނުދޭތާ އަހަރަކަށް ވުރެ ގިނަ ދުވަސްވެއްޖެ ކަމަށް ފީފާ އިން ކަނޑައަޅާފައިވާ ނޯމަލައިޒޭޝަން ކޮމިޓީން ބުނެފި އެވެ.
ނޯމަލައިޒޭޝަން ކޮމިޓީގެ ޗެއާމަން އަހްމަދު ޒުހޫރު ވިދާޅުވީ އެފްއޭއެމްގެ މުވައްޒަފުންނާއި، ޓެކްނިކަލް މުވައްޒަފުން، ކޯޗުން އަދި ރެފްރީންނަށް ފާއިތުވި 12 މަސް ދުވަހުގެ ތެރޭގައި ފުރިހަމަ މުސާރަ ދީފައި ނުވާ ކަމަށެވެ. އެކަމަކު މި ވަގުތު އެންމެ ބޮޑު އިސްކަމެއް ދެނީ އެފްއޭއެމް އިން ކުންފުނިތަކަށް ދަރާފައިވާ ފައިސާ ދެއްކުމަށް ކަމަށްވެސް ވިދާޅުވި އެވެ.
ޒުހޫރު ވިދާޅުވި ގޮތުގައި އެފްއޭމްއެގެ އެކްޓިން ޖެނެރަލް ސެކްރެޓަރީ މުހައްމަދު ޖައުޝަން ޝަރީފްވެސް މިވަގުތު މަސައްކަތް ކުރައްވަނީ ހިލޭ ސާބަހަށް ގައުމީ މަސައްކަތެއްގެ ގޮތުގައެވެ.
ޖައުޝަން ޝަރީފް ވިދާޅުވީ މުސާރަތައް ދިނުމަށް ހަތަރު ފިޔަވައްސަކަށް ބަހާލައިގެން ފީފާއާ އެކު އެއްބަސްވުމަކަށް އާދެވިފައިވާ ކަމަށެވެ. މި މަހުގެ ނިޔަލަށް އިދާރީ ހުރިހާ މުވައްޒަފުންގެ މުސާރަތައް ދެވޭނެ ކަމަށް އުއްމީދު ކުރައްވާ ކަމަށްވެސް ވިދާޅުވި އެވެ.
ފީފާއިން ވަނީ މުވައްޒަފުންނަށް މުސާރަ ދިނުމަށް ޝަރުތުކޮށް އެފްއޭއެމްއަށް ފައިސާ ދޫކޮށްފަ އެވެ.
އެފްއޭއެމްގެ ދަރަނި 85 މިލިއަން ރުފިޔާއަށް ވުރެ މަތިވާނެ ކަމަށްވެސް ޒުހޫރު ކުރިން ވިދާޅުވެފައިވެ އެވެ. ޒުހޫރު ވިދާޅުވީ މިހާތަނަށް ލިޔެކިޔުމުން ފެންނަން ހުރި އެފްއޭއެމްގެ ދަރަނީ އަދަދަކީ ގާތްގަނޑަކަށް 30 މިލިއަން ރުފިޔާއާއި 35 މިލިއަން ރުފިޔާއާ ދެމެދުގެ އަދަދެެއް ކަމަށެވެ. އެކަމަކު އެކިއެކި ގޮތްގޮތުން ލިބޭ މައުލޫމާތަށް ބަލާއިރު އެފްއޭއެމްގެ ޖުމްލަ ދަރަނި ކަމަށް ބުނެ ބައެއް ނޫސްތަކުގައި މީގެކުރިން ރިޕޯޓްކޮށްފައިވާ 85 މިލިއަން ރުފިޔާއަށް ވުރެ ޖުމްލަ ދަރަނި އިތުރުވާނެ ކަމަށް ކޮމިޓީގެ މެންބަރުންނަށް ލަފާ ކުރެވޭ ކަމަށްވެސް ވިދާޅުވި އެވެ.
"ބައެއް މީޑިއާތަކުން އެބަ ރިޕޯޓުކުރޭ 85 މިލިއަން ކަމަށް. އެހެންނަމަވެސް އަޅުގަނޑު ދަންނަވާނީ އެއަށްވުރެވެސް މަތިވާނެ ކަމަށް ބެލެވެއޭ،" ޒުހޫރު ވިދާޅުވި އެވެ.