މަތީ ތައުލީމަށް ކިޔަވާ ދަރިވަރުން ހަދާ ކޯސްތަކުގެ ހުރިހާ އިމްތިހާނަކުން 50 އިންސައްތަ ފާސްވެގެން ނޫނީ ކޯހުން ފާސްނުވެވޭ ގޮތަށް ނިންމައިފި އެވެ.
މޯލްޑިވްސް ކޮލިފިކޭޝަން އޮތޯރިޓީގެ ސީއީއޯ ފިޒާނާ ރަޝީދު ދައުލަތުގެ މީޑިއާގައި ވިދާޅުވީ މަތީ ތައުލީމުދޭ މަރުކަޒުތަކުގައި ކޯސް ހަދާ ކުދިންނަށް ހަވާލުކުރާ އެސައިންމަންޓުތައް އެހެން މީހުން ލައްވާ ހެދުމަކީ ގޯހެއް ކަމަށެވެ. އެކަން ހައްލުކުރުމަށްޓަކައި އެ ދަރިވަރުން ހަދާ ހުރިހާ އިމްތިހާނުތަކުން 50 އިންސައްތަ ލިބިގެން ނޫނީ ކޯހުން ފާސްނުވެވޭ ގޮތަށް އުސޫލަށް ބަދަލު ގެންނަން ނިންމާފައިވާ ކަމަށެވެ.
މީގެ ކުރިން އުސޫލުގައިވާ ގޮތުން ދަރިވަރު ހަދާ އިމްތިހާނުތަކުން ފާސްނުވި ނަމަވެސް އެ ދަރިވަރެއްގެ އެސައިންމަންޓުތަކުން ފާސްވުމަށް ބޭނުންވާ އިންސައްތަ ލިބިއްޖެނަމަ ކޯހުން ފާސްވުމުގެ ފުރުސަތު އޮވެ އެވެ.
ފިޒާނާ ވިދާޅުވީ އެ އެސައިންމަންޓްތައް އެހެން މީހުން ލައްވާ ހެދުމުގެ މައްސަލަ ހައްލުކުރުމަށް އުސޫލަށް ބަދަލު ގެންނަން ނިންމީ މަތީ ތައުލީމާ ބެހޭ މަރުކަޒުތަކުގެ އިސްވެރިންނާ ބައްދަލުކުރެއްވުމަށްފަހު ކަމަށެވެ.
"މިއުސޫލަށް ބަދަލު ގެނައުމަށްފަހު ވަރަށް އަވަހަށް އިސްލާހު ގެޒެޓުކުރާނަން،" ފިޒާނާ ވިދާޅުވި އެވެ.
އޭނާ ވިދާޅުވީ މި ބަދަލުގެ ސަބަބުން އެސައިންމަންޓް ގަތުމުގެ ބައިވެސް ކުޑަވެގެން ދާނެ ކަމަށެވެ.
ބައެއް ތައުލީމީ މަރުކަޒު ތަކުގައި ހަމައެކަނި އެސައިންމަންޓުން މަތީ މާކްސް ލިބިގެންވެސް މުޅި ކޯހުން ފާސްވުމުގެ ފުރުސަތު ލިބެ އެވެ. ގިނަ ހާލަތްތަކުގައި މި އެސައިންމަންޓުތައް ފުރިހަމަކުރަނީ އަގު ދީގެން ނުވަތަ އެހެން މީހަކު ލައްވަ އެވެ. ނަމަވެސް އެއީ ދަރިވަރު 5000 ރުފިޔާއިން ޖޫރިމަނާކޮށް، ދަރިވަރާ ދެކޮޅަށް ފިޔަވަޅު އެޅުމުގެ ހައްގު ތައުލީމީ މަރުކަޒަށް ލިބިގެންދާ ބޮޑު ކުށެކެވެ.