އައްޑޫ ސިޓީގައި އެޅުމަށް ހަމަޖެހިފައިވާ ވަގުފް އިމާރާތުގެ މަޝްރޫއަށް އެންމެ ރަނގަޅު ޕްރޮޕޯސަލެއް ހުށަހަޅާފައިވަނީ އައްޑޫ ސިޓީ ކައުންސިލުން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ރާއްޖޭގެ އެކި ސަރަހައްދުތަކުގައި ވަގުފް އިމާރާތްތަކެއް އެޅުމަކީ ރައީސް ޑރ. މުހައްމަދު މުއިއްޒުގެ ސަރުކާރުގައި މުހިއްމު ސިޔާސަތެކެވެ.
މިނިސްޓަރު ޝަހީމް ވިދާޅުވީ އައްޑޫގައި އަޅަން ނިންމާފައިވާ ވަގުފު އިމާރާތަށް އެންމެ ރަނގަޅު ޕްރޮޕޯސަލް ހުށަހެޅީ އައްޑޫ ސިޓީ ކައުންސިލުން ކަމަށްވާތީ އެ ޕްރަޕޯސަލާ އެކު ކުރިއަށް ދިއުމަށް ނިންމަފައިވާ ކަމަށެވެ.
"މިހާރު ކުރިއަށް ދަނީ ފީސިބިލިޓީ ހެދުމުގެ މަސައްކަތް،" ޝަހީމް ވިދާޅުވި އެވެެ.
މިނިސްޓަރު ވިދާޅުވި ގޮތުގައި މިމަޝްރޫއަކީ 30 މިލިއަން ރުފިޔާގެ މަޝްރޫއެކެވެ. އަދި މި މަޝްރޫއު ނިމުމުން އައްޑޫ ސިޓީގެ މިސްކިތްތައް މަރަމާތު ކުރުމަށާއި، އިސްލާމީ ކަންކަމަށް ހަރަދުކުރުމަށް ދައުލަތުން ހޭދަކުރަން ނުޖެހޭނެ ކަމަށްވެސް ވިދާޅުވި އެވެ.
ވަގުފު އިމާރާތުގެ މަޝްރޫއުގެ ދަށުން މާލެއާއި ހުޅުމާލޭގައިވެސް ވަގުފު އިމާރަތް އެޅުމަށް ވަނީ ނިންމާފަ އެވެ.
ހުޅުމާލޭގައި "ދާރުއްސަލާމް"ގެ ނަމުގައި ވަގުފް އިމާރާތެއް އެޅުމަށް މިހާރު ދަނީ ތައްޔާރުވަމުންނެވެ. މިއީ ރާއްޖޭގައި ބިނާކުރާ އެންމެ ބޮޑު ވަގުފް އިމާރާތަށް ވެގެންދާނެ ކަމަށްވެސް މިނިސްޓަރު ކުރިން ވިދާޅުވެފައިވެ އެެވެ.
މީގެ އިތުރުން މާލޭގައި "ދާރުލްއަރްގަމް" ނަމުގައި ވަގުފް މަޝްރޫއެއް ފެށުމަށްވެސް މިހާރު ދަނީ މަސައްކަތް ކުރަމުންނެވެ.