ރާއްޖޭގައި ޕެޓުގެ ގޮތުގައި ޖަނަވާރު ގެންގުޅުމާއި ބެހޭ ގާނޫނެއްގެ ބިލް ޑްރާފްޓްކޮށް ނިމިފައިވާ ކަމަށް އެގްރިކަލްޗާ މިނިސްޓަރު ޑރ. އައިޝަތު ރަމީލާ ވިދާޅުވެއްޖެ އެވެ.
ރަމީލާ ވިދާޅުވީ ރާއްޖޭގައި ޕެޓުގެ ގޮތުގައި ޖަނަވާރު ގެންގުޅެވޭނީ ރަޖިސްޓަރީކޮށްގެން ކަމަށް ކަނޑައެޅުމަށްޓަކައި އެކަމަށް ބޭނުންވާ ގާނޫނުގެ ބިލް މިހާރު ޑްރާފްޓްކޮށް ނިމި ބަންޑާރަނައިބުގެ އަފީހަށް ފޮނުވާފައިވާ ކަމަށެވެ.
މިނިސްޓަރު ވިދާޅުވީ މީގެ ކުރިން އެފަދަ ގާނޫނެއް ހަދާފައި ނެތުމުން އެފަދަ މަސައްކަތެއް ނިންމާލެވުމަކީ ވަރަށް ބޮޑު ހިތްހަމަޖެހުމެއް ކަމަށެވެ. ޕެޓްގެ ގޮތުގައި ގެންޅޭ ދިރޭ ތަކެތީގެ ސިއްހަތާ ގުޅޭ ކަންކަން ގާނޫނެއް އައުމުން ހަރުދަނާ ނިޒާމެއްގެ ދަށުން ކުރެވިގެން ދާނެ ކަމަށްވެސް ވިދާޅުވި އެވެ.
"ގާނޫނު ހެދުނީމަ ޕެޓްގެ ގޮތުގައި ގެންގުޅޭ ޖަނަވާރު ރަޖިސްޓަރީ ކުރެވޭނެ. އޭރުން ޓެގުވެސް ކުރެވިގެން ދާނެ،" ރަމީލާ ވިދާޅުވި އެވެ.
މިނިސްޓަރު ވިދާޅުވީ އޭރުން ގޭގޭގައި ގެންގުޅޭ ޖަނަވާރުތަށް މަގުމަތީ ގިނަވެގެން އުޅޭނަމަ އޭގެ ވެރިފަރާތް ހޯދަންވެސް ފަސޭހަ ވެގެން ދާނެ ކަމަށެވެ. އަދި ސިއްހައްތަށް ދިމާވާ ކަންކަމަށް ފަރުވާ ދެވޭނެ ރަނގަޅު ގާނޫނީ އޮނިގަނޑެއް ހެދުމަށް ފަސޭހަ ވެގެން ދާނެ ކަމަށްވެސް ވިދާޅުވި އެވެ.
މާލެ ސަރަހައްދުގައި އުޅޭ ބުޅަލުގެ އުދަނގޫ ބޮޑުވުމާ ގުޅިގެން އެގްރިކަލްޗާ އެންޑް އެނިމަލް ވެލްފެއާ މިނިސްޓްރީ އާއި މާލޭ ސިޓީ ކައުންސިލް ގުޅިގެން ހުޅުމާލޭގެ ފަރުކޮޅުފުށި ސަރަހައްދުގައި މިހާރު ވަނީ ޕެޓް ކެއާ ފެސިލިޓީއެއް ވެސް ހަދާފަ އެވެ.