ގާނޫނާ ހިލާފަށް ސަރުކާރުގެ ކުންފުނިތަކާއި ސިވިލް ސާވިސްގެ ވަޒީފާތަކުން ވަކިކުރާ މީހުންނަށް ގާނޫނީ އެހީތެރިކަން ދިނުމަށް އިދިކޮޅު އެމްޑީޕީން ނިންމައިފި އެވެ.
އެމްޑީޕީން މިއަދު ކުރި އިއުލާނެއްގައި ބުނީ ސަރުކާރާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ތާއީދުނުކުރާ މުވައްޒަފުންނަށް ސިޔާސީ ގޮތުން ބިރު ދައްކަމުންދާ ކަމަށެވެ.
އެމްޑީޕީން ބުނީ ސިޔާސީ ސަބަބުތަކަށްޓަކައި އެގޮތަށް ބިރުދައްކައިގެން ވަޒީފާއިން ވަކިކުރާ މީހުންނަށް ގާނޫނީ އެހީތެރިކަން ފޯރުކޮށްދޭން އެ ޕާޓީން ނިންމާފައިވާ ކަމަށެވެ.
"ސިޔާސީ ސަބަބުތަކަށްޓަކައި ވަޒީފާތަކުން ވަކިކުރަމުންދާތީ އެކަމުގައި އަޅަންޖެހޭ ގާނޫނީ ފިޔަވަޅުތައް އެޅުމުގައި އެ މުވައްޒަފުންނަށް އެހީތެރިވުމަށް އެމްޑީޕީން ވަނީ ނިންމާފައި،" އިއުލާނުގައިވެ އެވެ.
އެމްޑީޕީން ވަނީ އެހީތެރިކަން ބޭނުންވާ މީހުން އެ ޕާޓީން ދީފައިވާ އީމެއިލް -- [email protected] ނުވަތަ ވައިބާ ނަމްބަރު 7341637 މެދުވެރިކޮށް ވަޒީފާއާ ގުޅޭ އެންމެހާ މައުލޫމާތު ފޮނުވުމަށް އެދިފަ އެވެ.
ސަރުކާރު ކުންފުނިތަކުގެ މުވައްޒަފުން ވަޒީފާއިން ވަކިކުރަމުންދާއިރު އެމްޑީޕީގެ އިތުރުން ބައެއް އާންމުންވެސް ގެންދަނީ ސިޔާސީ ސަބަބުތަކާ ހެދި މީހުން ވަކި ކުރާ ކަމަށާއި އެއީ ގޯހެއް ކަމަށް ބުނަމުންނެވެ.