ރާއްޖޭގައި ދިރިއުޅޭ މީހުންގެ އާބާދީ ހަ ލައްކައަށްވުރެ މައްޗަށް ހިނގައްޖެ އެވެ.
މަރުކަޒީ ބޭންކް -- މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުކޮށްފައިވާ މި އަހަރުގެ ސެޕްޓެމްބަރު މަހުގެ ތަފާސްހިސާބުތައް ދައްކާ ގޮތުން ރާއްޖޭގެ އާބާދީއަކީ 601،269 އެކެވެ.
އެމްއެމްއޭގެ ތަފާސްހިސާބުގައި މި އަދަދުގެ އިތުރު ތަފުސީލެއް ހިމަނާފައިނުވެ އެވެ.
ރާއްޖޭގައި ދިރިއުޅޭ އާބާދީ ހަ ލައްކައަށް އަރާފައިވާ ކަމަށް އެމްއެމްއޭ އިން ހާމަކުރިއިރު މޯލްޑިވްސް ބިއުރޯ އޮފް ސްޓެޓިސްޓިކްސް އިން 2022 ވަނަ އަހަރު ކުރިއަށް ގެންދިޔަ ބޯހިމެނުމަށްފަހު އެ އަހަރުގެ އޮކްޓޫބަރު މަހު ހާމަކުރި ގޮތުގައި ރާއްޖޭގައި ދިރިއުޅޭ އާބާދީއަކީ 452،495 މީހުންނެވެ.
އޭގެ ތެރެއިން 355،331 މީހުންނަކީ ދިވެހިން ކަމަށާއި ބިދޭސީންގެ އާބާދީއަކީ 97،164 މީހުން ކަމަށް ސްޓެޓިސްޓިކްސް ބިއުރޯ އިން އޭރު ހާމަކުރި އެވެ.
އޭގެ ކުރިން 2014 ވަނަ އަހަރު ބޭއްވި ބޯހިމެނުމުގެ ނަތީޖާގައިވާ ގޮތުން އޭރު ރާއްޖޭގައި ދިރިއުޅޭ އާބާދީ އަކީ 402،071 މީހުންނެވެ. އޭރު ދިވެހިންގެ އާބާދީއަކީ 338،434 މީހުންނެވެ. ބިދޭސީންގެ އޭރުގެ އާބާދީ އަކީ 63،637 މީހުންނެވެ.