އަލް ނަސްރު މޮޅުވި މެޗުގައި ރޮނާލްޑޯގެ ހިތްގައިމު ގޯލެއް

އޭއެފްސީ ޗެމްޕިއަންސް ލީގުގައި ސައުދީ އަރަބިއްޔާގެ އަލް ނަސްރު ވަނީ ގަތަރުގެ އަލް ރައްޔާން އަތުން 2-1 އިން މޮޅުވެފަ އެވެ.

ސައޫދީގެ ރިޔާދުގައި ބޭއްވުނު މި މެޗުގައި އަލް ނަސްރުގެ ގޯލްތައް ޖެހީ ސަޑިއޯ މާނޭ އާއި ކްރިސްޓިއާނޯ ރޮނާލްޑޯ އެވެ.

މެޗުގެ ފުރަތަމަ ގޯލް ޖެހީ ފުރަތަމަ ހާފުގެ އިތުރު ވަގުތުގައި ސަޑިއޯ މާނޭ އެވެ. އޭގެފަހުން ދެވަނަ ހާފްގައި 76 ވަނަ މިނެޓުގައި ރޮނާލްޑޯ ވަނީ އަލް ނަސްރުގެ ދެވަނަ ލަނޑު ޖަހާފަ އެވެ.

އަލް ރައްޔާންގެ ފަރާތުން މެޗުގެ 87 ވަނަ މިނެޓުގައި ލަނޑެއް ޖެހީ ބްރެޒިލްގެ ފޯވާޑް ރޮޖާ ގުއެޑެޒް އެވެ.

މިއީ އަލް ނަސްރުގެ އާ ކޯޗު އަދި އޭސީ މިލާނުގެ ކުރީގެ ކޯޗު ޕިއޮލީ ހަވާލުވުމަށްފަހު އެ ޓީމު ބަލިނުވެ ކުޅުނު ހަތަރުވަނަ މެޗެވެ.

އަލް ނަސްރު އެންމެ ފަހުން ކުޅެފައިވާ މެޗުގައި އިރާގުގެ އަލް ޝޯޓާއާ ދެކޮޅަށް ކުޅެ، އެ މެޗު ނިމިފައިވަނީ ދެ ޓީމު އެއްވަރުވެގެންނެވެ.