ސްކޫލަކަށް ވަދެ ޓީޗަރުންނަށް ބިރު ދެއްކިކަމުގެ ތުހުމަތުގައި ހައްޔަރުކުރި މއ. ކަނޑޫގެ، އަލީ އަހްމަދު ފުލުހުންގެ ބަންދުން މިއަދު ދޫކޮށްލައިފި އެވެ.
އަލީ އަހްމަދު ދޫކޮށްލިއިރު އޭނާގެ މައްޗަށް ދައުވާކުރުމަށް ޕީޖީ އޮފީހަށް ފޮނުވާފަ އެވެ.
އަލީ އަހްމަދު ދޫކޮށްލާފައި މިވަނީ އޭނާ ހައްޔަރުކޮށްފައި ހުންނަތާ ދެ މަހެއްހާ ދުވަސް ފަހުންނެވެ.
އޭނާގެ ބަންދު މުއްދަތު ކުރިން އެކި ފަހަރު މަތިން އިތުރުކުރަމުން ދިޔުމަށްފަހު މިއަދު މިނިވަން ކުރީ ދައުލަތުން އެކަމަށް އިއުތިރާޒް ނުކުރުމުންނެވެ.
އަލީ އަހްމަދުގެ ބަންދު އަމުރު ރިޕޯޓުން އެނގޭ ގޮތުގައި އޭނާ ސްކޫލަކަށް ވަދެ، އަޑު ގަދަކޮށް ޓީޗަރުންނަށް ބިރު ދެއްކި ކަމަށް އެ ސްކޫލުގެ މުވައްޒަފުން ބުނެފައިވެ އެވެ. އެހެންނަމަވެސް އެއީ ކޮން ސްކޫލެއް ކަމެއް އެނގިފައެއް ނުވެ އެވެ.
މިކަމާ ގުޅޭ ގޮތުން މިހާތަނަށް އެޑިޔުކޭޝަން މިނިސްޓްރީންވެސް އެއްވެސް އެއްޗެއް ބުނެފައެއް ނުވެ އެވެ.
އަލީ އަހްމަދަކީ މީގެ ކުރިންވެސް ކުށުގެ ރެކޯޑްތައް އޮންނަ މީހެކެވެ. ކޯޓުގެ ރިޕޯޓްތަކުން އެނގޭ ގޮތުގައި 2020 ވަނަ އަހަރުގެ ތެރޭގައި ރާއްޖެއަށް 72 ކިލޯގެ މަސްތުވާތަކެތި އެތެރެކުރި މައްސަލައިގައި ދައުލަތުން ދައުވާ އުފުލި މީހުންގެ ތެރޭގައިވެސް އޭނާ ހިމެނެ އެވެ. އެ ފަހަރު އޭނާގެ މައްޗަށް އުފުލާފައިވަނީ ޑައިމޯފިން ޓްރެފިކް ކުރުމުގެ ކުށުގެ ދައުވާ އެވެ.