ނެދަލަންޑްސްގެ ކުރީގެ ބޮޑުވަޒީރު، މާކު ރުތޭ، ނޯތު އެޓްލާންޓިކް ޓްރީޓީ އޮގަނިއިޒޭޝަން (ނޭޓޯ) ގެ ސެކްރެޓަރީ ޖެނެރަލްގެ މަގާމާ ހަވާލުވެވަޑައިގެންފި އެވެ. އެ މަގާމުގައި މިހާތަނަށް ހުންނެވީ ޔެންސް ސްޓޮލްޓަންބާގް އެވެ. އޭނާ އަކީ ނޯވޭގެ ރައްޔިތެކެވެ.
ޔެންސް ސްޓޮލްޓަންބާގް، 65، ނޭޓޯގެ ސެކްރެޓަރީ ޖެނެރަލްގެ މަގާމާ ހަވާލުވެވަޑައިގަތުމުގެ ކުރިން ނޯވޭގެ ބޮޑުވަޒީރުކަން ދެ ފަހަރަކު ވަނީ އަދާކުރައްވާފަ އެވެ. އެއީ 2000 އިން 2001 އަށް އަދި 2005 އިން 2013 އަށެވެ.
ނޭޓޯ އަކީ އަސްކަރީ ޖަމާއަތެކެވެ. މި ޖަމާއަތް އުފެއްދުމުގެ ބޭނުނަމީ ޔޫރަޕިއަން ޔޫނިއަންގެ ރައްކާތެރިކަމާއި ސަލާމަތްތެރިކަން ކަށަވަރުކުރުށެވެ.
ނޭޓޯގެ އަސާސީ ގަވާއިދު ބާރުއަޅަނީ މެމްބަރު ގައުމަކަށް އެހެން ގައުމަކުން ގޯނާއެއްކޮށްފި ނަމަ، އެ ގައުމަކާ ދެކޮޅަށް ނޭޓޯގެ މެމްބަރު ހުރިހާ ގައުމުތަކުން ތެދުވުމަށެވެ. އަދި މެމްބަރު ގައުމުގެ ސަލާމަތާއި ރައްކާތެރިކަން ކަށަވަރުކުރުމަށެވެ.
މާކު ރުތޭ، 57، ނޭޓޯގެ ސެކްރެޓަރީ ޖެނެރަލްގެ މަގާމާ ހަވާލުވެވަޑައިގަތުމުގެ ކުރިން ނެދަލަންޑްސްގެ ބޮޑުވަޒީރުގެ މަގާމު ވަނީ އަދާކުރައްވާފަ އެވެ. އޭނާގެ ބޮޑުވަޒީރުގެ ދައުރު އޮކްޓޯބަރު 14، 2010 އިން ޖުލައި 2، 2024 އަށް ވަނީ ނިމިފަ އެވެ.
މާކު ރުތޭ މަގާމާ ހަވާލުވެވަޑައިގަތުމަށް ފަހު ފުރަތަމަ ދެއްވި އިންޓަވިއުގައި ވިދާޅުވީ އަސްކަރީ ޖަމާއަތެއްގެ ގޮތުގައި ނޭޓޯ އަކީ ބާރުގަދަ އަދި އިތުބާރު ބޮޑު ޖަމާއަތަކަށް ހައްދަވާނެ ކަމަށެވެ.
މެމްބަރު ގައުމުތަކަށް ކުރިމަތިވާ ނުރައްކާތަކުގައި ސާބިތުވެ އޮންނާނެ ކަމަށް ވެސް އޭނާ ވިދާޅުވި އެވެ.
ޔުކްރޭން މިނިވަން ނުކޮށް ޔޫރަޕަށް މިނިވަންކަމެއް ނެތް ކަމަށް ރުތޭ ވިދާޅުވި އެވެ. ޔުކްރޭނަށް ނޭޓޯ މެމްބަރުކަން ދެއްވާނެ ކަމަކަށް އޭނާ ވިދާޅެއް ނުވެ އެވެ. ނަމަވެސް، ޔުކްރޭނާ މެދު ވަރަށް ގާތުން ދެކެވަޑައިގަންނަވާނެ ކަމަށް ވިދާޅުވި އެވެ.
ދުނިޔޭގައި ނޭޓޯއާ އެއް ފިކުރެއްގެ ގައުމުތަކާ ގުޅުން ބަދަހިކުރައްވާނެ ކަމަށް ވެސް އޭނާ ވިދާޅުވި އެވެ. އަދި ނޭޓޯއަށް ޝައުގުވެރިވާ ގައުމުތަކާ އެކު މަސައްކަތްކުރައްވާނެ ކަމަށްވެސް ވިދާޅުވި އެވެ.
ރުތޭ ވިދާޅުވި ގޮތުގައި ޔުކްރޭން މިނިވަންވުމަށް ދާންދެން ހަނގުރާމަކުރުމަށް ނޭޓޯ ތާއީދެވެ. މިނިވަން ޔުކްރޭނެއް ނެތި ނޭޓޯގެ މަގުސަދު ހާސިލް ނުވާނެ ކަމަށްވެސް އޭނާ ވިދާޅުވި އެވެ.