ކާބޯތަކެތީގެ އަގުތައް މިދިޔަ އޮގަސްޓް މަހު އުފުލުނު ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އިން ހާމަކޮށްފި އެވެ.
ސްޓެޓިސްޓިކްސް ބިއުރޯ އިން އާއްމުކޮށްފައިވާ މި އަހަރުގެ އޮގަސްޓް މަހުގެ ކޮންސިއުމާ ޕްރައިސް އިންޑެކްސް (ސީޕީއައި) ދައްކާ ގޮތުން މުދަލާއި ހިދުމަތުގެ އަގުތައް 2023 ވަނަ އަހަރުގެ އޮގަސްޓް މަހާ އަޅާބަލާއިރު މި އަހަރުގެ އޮގަސްޓް މަހު ވަނީ 1.43 ޕަސެންޓް އުފުލިފަ އެވެ.
މުދަލާއި ހިދުމަތުގެ އަގުތައް މި އަހަރުގެ ޖުލައި މަހާ އަޅާބަލާއިރު އޮގަސްޓް މަހު 0.19 ޕަސެންޓް އުފުލުނެވެ.
އަގުތައް އުފުލުނު މުދަލާއި ހިދުމަތްތައް
- މޭވާ: 4.87 ޕަސެންޓް
- ތަރުކާރީ: 2.17 ޕަސެންޓް
- އައުޓް ޕޭޝަންޓް ކެއާ ހިދުމަތް: 1.13 ޕަސެންޓް
- ސަޕްލައި ފެން: 0.61 ޕަސެންޓް
- ކޮފީ: 1.40 ޕަސެންޓް
- ހަކުރު، ޖޭމް، މާމުއި، ޗޮކްލެޓް: 0.48 ޕަސެންޓް
އަގުތައް ހެޔޮވި މުދަލާއި ހިދުމަތްތަކުގެ ތެރޭގައި ކަރަންޓާއި މޯބައިލް މުވާސަލާތީ ހިދުމަތް ހިމެނެ އެވެ.
އެ ގޮތުން ކަރަންޓުގެ އަގު 1.94 ޕަސެންޓް އަދި މޯބައިލް މުވާސަލާތީ ހިދުމަތުގެ އަގު 2.56 ޕަސެންޓް ހެޔޮވި އެވެ.
މީގެ އިތުރުން ކިރާއި، ޑެއިރީ ޕްރޮޑަކްޓްސް އަދި ބިހުގެ އަގު 0.83 ޕަސެންޓް ހެޔޮވި ކަމަށް ސީޕީއައި ރިޕޯޓުން ދައްކަ އެވެ.