އާންމު އަދި ވިޔަފާރީގެ ބޭނުންތަކަށް ޑްރޯން ބޭނުންކުރުމާ ބެހޭ ގޮތުން އެކުލަވާލާ ގަވާއިދުތަކަށް ހިޔާލު ހުށަހެޅުމަށް މޯލްޑިވްސް ސިވިލް އޭވިއޭޝަން އޮތޯރިޓީ (ސީއޭއޭ) އިން ހުޅުވާލައިފި އެވެ.
އެ އޮތޯރިޓީން އެކުލާވާލާ ގަވާއިދުތަކަށް ހިޔާލު ހުށަހެޅުމުގެ ފުރުސަތު ސަރުކާރު މުއައްސަސާތަކާއި، ކުންފުނިތަކާއި، ޖަމިއްޔާތައް އަދި އާންމު ރައްޔިތުންނަށް ވެސް ހުޅުވާލާފައިވެ އެވެ. އެ ފުރުސަތު އަންނަ ނޮވެމްބަރު މަހުގެ 15 ވަނަ ދުވަހުގެ ނިޔަލަށް ލިބޭނެ އެވެ.
ސީއޭއޭ އިން ބުނީ ގަވާއިދުގައި ކަމެއް ހިމަނަން ބޭނުންވާނަމަ ސަބަބާއެކު ހުށަހެޅޭނެ ކަމަށާއި ހާއްސަކޮށް ޑްރޯން ބޭނުންކޮށްގެން އިޝްތިހާރު ފަދަ އެއްޗެހި ހެދުމުގެ މަސައްކަތްކުރާ މީހުންގެ ހިޔާލު ގަވާއިދު ހެދުމުގައި ބޭނުންވާ ކަމަށެވެ.
އޮތޯރިޓީން ބުނީ މީގެ ސަބަބުން އާންމު ބޭނުންތަކަށް އަދި ވިޔަފާރީގެ ބޭނުންތަކަށް ޑްރޯން އޮޕަރޭޓް ކުރާ މީހުންނަށް ރައްކާތެރިކަމާއެކު ޑްރޯން ދުއްވޭނެ މާހައުލެއް ގާއިމުކުރެވޭނެ ކަމަށެވެ.
ސީއޭއޭއިން މިހާރު އެކުލަވާލާފައިވާ ގަވާއިދަކީ ޔޫރަޕްގެ ގަވާއިދުތައް އަސްލަކަށް ބަލައިގެން ހަދާފައިވާ ގަވާއިދުތަކެކެވެ.
ސީއޭއޭއިން އިތުރަށް ބުނީ ގަވާއިދު ތަންފީޒު ކުރުމަށްފަހު ޖިއޮގްރަފިކަލް ޒޯނުތައް ކަނޑައަޅާ، ޑްރޯނު ދުއްވޭނެ ސަރަހައްދުތައް ކަނޑައަޅާނެ ކަމަށެވެ. އަދި އޭގެ ތެރެއިން ހުއްދަ އޮވެގެން ޑްރޯން ދުއްވޭ ސަރަހައްދުތައް އަދި ޑްރޯން ދުއްވުން މަނާ ހިސާބުތައްވެސް އާންމުކުރާނެ ކަމަށެވެ.
ގަވާއިދު ތަންފީޒު ކުރުމަށްފަހު ޑްރޯން އޮޕަރޭޓް ކުރާ ފަރާތްތައް ރަޖިސްޓްރީކުރުމުގެ މަސައްކަތާއި، އެ މީހުންގެ ފެންވަރުވެސް ކަނޑައަޅާނެ ކަމަށް ސީއޭއޭ އިން ބުނެފައިވެ އެވެ.