އިޒުރޭލުގެ ޒަޔަނިސްޓް ސަރުކާރުން ފަލަސްތީންގެ ޣައްޒާއަށް ދެމުންދާ ފަނާކުރަނިވި ހަމަލާތަކުގައި 79 ޕަސެންޓް މިސްކިތް ބިމާ ހަމަކޮށްފައިވާ ކަމަށް ޣައްޒާގައި ހުންނަ މިނިސްޓްރީ އޮފް ރެލިޖަސް އެފެއާޒް އިން ބުނެފި އެވެ.
މިނިސްޓްރީ އޮފް ރެލިޖަސް އެފެއާޒުން ބުނާ ގޮތުން ޣައްޒާގައި ހުންނަ 1،245 މިސްކިތުގެ ތެރެއިން ޔަހޫދީންގެ ހަމަލާތަކުގައި 814 މިސްކިތެއް ވަނީ ބިމާހަމަކޮށްލާފަ އެވެ. އަދި އިތުރު 148 މިސްކިތަކަށް ބޮޑެތި ގެއްލުންތައް ލިބި -- ބޮޑެތި މަރާމާތުތަކަކަށް ބޭނުންޖެހިފައި ހުރި ކަމަށްވެސް އިސްލާމިކް މިނިސްޓްރީން ބުންޏެވެ.
އެ މިނިސްޓްރީން ބުނީ މިސްކިތްތަކުގެ އިތުރުން އެހެން ދީންތަކުގެ މީހުން އަޅުކަންކުރަން ބޭނުންކުރާ ފައްޅިތަކަށް ވެސް ބޮޑެތި ގެއްލުންތަކެއް ދީފައިވާ ކަމަށެވެ.
އިސްލާމިކް މިނިސްޓްރީން ބުނި ގޮތުން ޣައްޒާގައި ބޭނުންކުރެވޭ ފެންވަރުގައި ހުރި 60 ސަހަރާގެ ތެރެއިން 19 ސަހަރާއެއްވެސް ބޭނުންނުކުރެވޭ ވަރަށް ޒަޔަނިސްޓުންގެ ހަމަލާތަކުގައި ހަލާކުކޮށްލާފައިވާ ކަމަށެވެ.
މި ސަހަރާތަކުގައި އަލުން މީހުން ވަޅުލުމަށްޓަކައި ބޮޑު ހޭދައެއް ކުރަން ޖެހޭނެ ކަމަށްވެސް މިނިސްޓްރީން ބުންޏެވެ.
އިސްލާމިކް މިނިސްޓްރީން ބުނި ގޮތުން ޒަޔަނިސްޓުންގެ އަނިޔާވެރި ހަމަލާތަކުގައި -- މިނިސްޓްރީން ބަލަހައްޓާ ތަކެއްޗަށް ދީފައި ހުރި ގެއްލުން 350 މިލިއަން ޑޮލަރަށް އަރާނެ އެވެ.
އިސްލާމީ ބިނާތަކަށް ޔަހޫދީން ބޮޑެތި ގެއްލުންތައް ދީފައިވާއިރު، މިނިސްޓްރީން ބުނި ގޮތުން ސަރަހާގައި ވަޅުލާފައި ތިބި ގަބުރުތައް ކޮނެގެންވެސް ވަނީ ނަގާފަ އެވެ.
ކޮނެގެން ނެގި ގަބުރުތަކުން ގުނަވަންތައް ވަގަށް ނެގި މައްސަލަތަކެއް އުޅޭ ކަމަށްވެސް މިނިސްޓްރީން ބުންޏެވެ.
މިނިސްޓްރީ އޮފް ރެލިޖަސް އެފެއާޒުން ބުނި ގޮތުން، މިސްޓްރީގެ ދަށުގައި ހުރި ސްކޫލް މަދަރުސާތަކަށްވެސް ޔަހޫދީން ބޮޑެތި ގެއްލުންތަކެއް ދިނެވެ. އަދި މިނިސްޓްރީގެ 238 މުވައްޒަފަކު މަރާލާފައިވާ ކަމަށްވެސް ބުންޏެވެ.
އިޒުރޭލު ސިފައިން އެއްގަމު މަގުން ޣައްޒާއަށް އަރައިގަނެ މިނިސްޓްރީގެ އިމާރާތްތަކަށް ވަދެ ޖަރީމާތައް ހިންގި ކަމަށްވެސް އެ އިދާރާއިން ބުންޏެވެ.
ޣައްޒާގައި ހުރި އިސްލާމީ ޝިއާރުތަކަށާއި ނިޝާންތަކަށް ދީފައި ހުރި ގެއްލުންތައް ބައިނަލްއަގުވާމީ އިދާރާތަކަށް ހުށަހަޅާނެ ކަމަށްވެސް މިނިސްޓްރީ އޮފް ރެލިޖަސް އެފެއާޒުން ބުންޏެވެ.