އިންޑިއާގެ އިންސްޓެންޓް ޕޭމާންޓް ސިސްޓަމް -- ޔުނިފައިޑް ޕޭމާންޓްސް އިންޓަފޭސް (ޔޫޕީއައި)ގެ ދަށުން ރުޕޭ ކާޑު ރާއްޖޭގައި ތައާރަފްކޮށްފި އެވެ.
ރުޕޭ ކާޑުގެ ހިދުމަތް ރަސްމީކޮށް ރާއްޖޭގައި ފެށީ ރައީސް ޑރ. މުހައްމަދު މުއިއްޒު މިހާރު އިންޑިއާއަށް ކުރައްވަމުން ގެންދަވާ ފުރަމާނަ ދަތުރުފުޅުގައި އިންޑިއާގެ ބޮޑުވަޒީރު ނަރެންދުރާ މޯދީއާ އެކު މިއަދު ކުރިއަށް ގެންދިޔަ ރަސްމީ މަޝްވަރާތަކަށްފަހު ދެ ބޭފުޅުން މީޑިއާއަށް ބަޔާނެއް ދެއްވުމުގެ ކުރިންނެވެ.
ރާއްޖޭގައި ރުޕޭ ކާޑު ބޭނުންކުރަން ފަށައި ފުރަތަމަ ޓްރާންސެކްޝަން ހެދި މަންޒަރުވެސް ވަގުތުން ދުރަށް ދައްކާފައުވެ އެވެ.
އިންޑިއާގައި ބޮޑު މަގުބޫލު ކަމެއް ހޯދާފައިވާ ރުޕޭ ކާޑުގެ ޑެބިޓް އަދި ކްރެޑިޓް ކާޑު އިންޑިއާއަށް ތައާރަފް ކުރީ 2016 ވަނަ އަހަރު އެެވެ.
އިންޑިއާގެ ޔުޕީއައި ޕޭމެންޓް ސިސްޓަމަކީ މޯބައިލް ފޯނު މެދުވެރިކޮށް އިންޓަ ބޭންކް މުއާމަލާތްތައް ކުރެވޭ ގޮތަށް ހަދާފައިވާ ސިސްޓަމެކެވެ.
ރުޕޭ ކާޑު ރާއްޖޭގައި ތައާރަފް ކުރުމާ ގުޅިގެން ބީއެމްއެލްގެ އޭޓީއެމްތަކާއި ޕީއޯއެސް މެޝިން އަދި އެހެނިހެން ޑިޖިޓަލް ޗެނަލްތަކުގައިވެސް ރުޕޭ ކާޑު ބޭނުންކުރެވޭނެ އެވެ.
ރާއްޖޭގައި ރުޕޭ ކާޑު ބޭނުންކުރެވޭ ގޮތް ހެދުމުން ރާއްޖެ އަންނަ އިންޑިއާ މީހުންނަށް އަދި އިންޑިއާއަށް ދާ ދިވެހިންނަށް ރުޕޭ ކާޑު ބޭނުންކޮށްގެން ވިޔަފާރި ކުރެވޭނެ އެވެ.
ރުޕޭ ކާޑު ރާއްޖޭގައި ތައާރަފްކޮށްފައި މިވަނީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން ދެ ގައުމުގެ ދެމެދުގައި މިކަމާ ގުޅޭގޮތުން ގިނަ ދުވަސްވީ މަޝްވަރާތަކެއް ކުރުމަށްފަހު އެވެ.