އިންޑިއާ ކަނޑުގެ ސަލާމަތަށް އިންޑިއާގެ ބައިވެރިވުން މުހިއްމު ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް އިންޑިއާއަށް ކުރައްވަމުން ގެންދަވާ ފުރަމާނަ ދަތުރުފުޅުގައި އެ ގައުމުގެ ބޮޑުވަޒީރު ނަރެންދުރަ މޯދީއާއެކު ބޭއްވި ޕްރެސް ސްޓޭޓްމަންޓުގައި ރައީސް މުއިއްޒު ވިދާޅުވީ އިންޑިއާ ކަނޑުގެ ސަލާމަތާއި ރައްކާތެރިކަމަށް އިންޑިއާގެ ބައިވެރިވުން ވަރަށް މުހިންމު ކަމަށެވެ.
ރައީސް ވިދާޅުވީ އިންޑިއާ ކަނޑުގެ ސަލާމަތާއި ރައްކާތެރިކަމަށްޓަކައި ރާއްޖޭގައި ހަމަޖެހުން އޮތުންވެސް މުހިއްމު ކަމަށެވެ.
ދެ ގައުމުގެ ދެމެދުގައި އިގްތިސާދީ ގޮތުން ގުޅުން ބަދަހި ކުރުމާއި ކަނޑުގެ ސަލާމަތާއި ރައްކާތެރިކަމުގެ ދާއިރާއިން ގުޅުން ބަދަހިކުރުމުގެ ބޭނުމުގައި "ވިޝަން ޑޮކިއުމެންޓް" އަކަށް އެއްބަސްވެފައިވާ ކަމަށް ރައީސް މުއިއްޒުގެ ބަޔާނުގައި ވިދާޅުވި އެވެ.
ރައީސް ވިދާޅުވީ ހައިޑްރޯގްރަފީގެ ދާއިރާއިންވެސް އިންޑިއާ އާއި އެކު ގުޅުން ބަދަހިކުރާނެ ކަމަށާއި އަދި ދިފާއީ ގޮތުންވެސް އިންޑިއާގެ އެއްބާރުލުން އިތުރުކުރުމަށް މަޝްވަރާތައް ކުރިއަށް ގެންދަވާނެ ކަމަށެވެ. އެގޮތުން ދިވެހި ސިފައިންގެ ގާބިލުކަން އިތުރުކުރުމަށް އިންޑިއާއިން ދޭ އެއްބާރުލުން އިތުރުކުރުމަށް މަޝްވަރާ ކުރާނެ ކަމުގައި ވިދާޅުވި އެވެ.
ރާއްޖެއިން އެދޭ ކޮންމެ ފަހަރަކު އިންޑިއާގެ އެހީތެރިކަން ލިބޭކަން ފާހަގަކުރައްވަމުން ރައީސް ވިދާޅުވީ ރާއްޖެއަކީ އިންޑިއާގެ ތަރައްގީއަށް މުހިއްމު ބައިވެރިއެއް ކަމަށެވެ. އަދި މުސްތަގުބަލްގައި އިންޑިއާ އިން ރާއްޖެ އަންނަ ފަތުރުވެރިން އިތުރުވެގެންދާނެ ކަމަށް އުއްމީދު ކުރައްވާ ކަމަށްވެސް ވިދާޅުވި އެވެ.
މޯދީގެ ބަޔާނުގައި ވިދާޅުވީ އިންޑިއާ ކަނޑުގެ ސަރަހައްދުގެ ސަމާތާއި ހަމަޖެހުން ކަށަވަރުކުރުމަށްޓަކައި ހައިޑްރޯގްރަފީއާއި ޑިޒާސްޓާ މެނޭޖްމަންޓް ދާއިރާއިން ރާއްޖެއަށް އެއްބާރުލުން ދޭ ތައްޔާރަށް ހުންނެވި ކަމަށެވެ.