އިންޑިއާގެ ކޮންސިއުލޭޓެއް އައްޑޫ ސިޓީގައި ހުޅުވަން އަނެއްކާވެސް ރާއްޖެއާއި އިންޑިއާ އަލުން މަޝްވަރާކޮށްފި އެވެ.
އައްޑޫ ސިޓީގައި އިންޑިއާގެ ކޮންސިއުލޭޓެއް އެޅުމުގެ މަޝްވަރާތައް އެންމެ ފުރަތަމަ ފެށީ ނިމިދިޔަ އެމްޑީޕީގެ ސަރުކާރުގައި މެއި 2021 ގެ ތެރޭގައެވެ.
ނަމަވެސް އޭރު އެ ވާހަކަތައް ނޫސްތަކުގައި ރިޕޯޓް ކުރުމާ ގުޅިގެން އޭރު އިދިކޮޅުގައި އޮތް ޕީޕީއެމް އާއި ޕީއެންސީގެ ފާޑުކިޔުމާއި ފިއްތުއްތަކާ ހެދި އެކަން އިތުރަށް ހިނގައިގަންނަ ގޮތް އޮތީ ނުވެފަ އެވެ.
އިންޑިއާގެ ކޮންސިއުލޭޓެއް އައްޑޫ ސިޓީގައި ހުޅުވަން އަނެއްކާވެސް ރާއްޖެއާއި އިންޑިއާ އިން އަލުން މަޝްވަރާތައް މިއަދު ފެށީ ރައީސް ޑރ. މުހައްމަދު މުއިއްޒު މިހާރު އިންޑިއާއަށް ކުރައްވަމުން ގެންދަވާ ފުރަމާނަ ދަތުރުފުޅުގައި އިންޑިއާގެ ބޮޑުވަޒީރު ނަރެންދުރަ މޯދީއާ އެކު މިއަދު ބޭއްވެވި ރަސްމީ މަޝްވަރާތަކުގައެވެ.
މަޝްވަރާތަކަށްފަހު ރައީސް މުއިއްޒު އަރިހުގައި ހުންނަވައިގެން މޯދީ ވިދާޅުވީ އައްޑޫގައި އިންޑިއާގެ ކޮންސިއުލޭޓެއް ހުޅުވުމަށް މަޝްވަރާ ކުރެވުނު ކަމަށެވެ. ނަމަވެސް ރައީސް މުއިއްޒު ދެއްވި ބަޔާނުގައި އެފަދަ ވާހަކައެއް ހިއްސާކުރައްވާފައެއް ނުވެ އެވެ.
އައްޑޫގައި އިންޑިއާގެ ކޮންސިއުލޭޓެއް ހުޅުވުމަކީ އިންޑިއާ ސަރުކާރުން ވަރަށް ބޮޑަށް ބޭނުންވާ ކަމެކެވެ. އިންޑިއާ ސަރުކާރުގެ މިހުށަހެޅުމަށް އައްޑޫ ސިޓީ ކައުންސިލުން ވަނީ މަރުހަބާ ވެސް ކިޔާފަ އެވެ.
ރާއްޖޭގައި ހުންނަ އިންޑިއާގެ ހައި ކޮމިޝަން ހުޅުމާލޭގައި ހިންގަމުންދާއިރު ރާއްޖޭގެ ހައި ކޮމިޝަން އިންޑިއާގައި ހުންނަނީ ވެރިރަށް ނިއުދިއްލީގައެވެ. އެކަމަކު ޓްރިވެންޑްރަމްގައި ރާއްޖޭގެ އިތުރު ކޮންސިއުލޭޓެއް ހުރެ އެވެ. އަދި ރާއްޖޭގެ ބެންގަލޫރުގައިވެސް ކޮންސިއުލޭޓެއް ހުޅުވުމަށް ދިވެހި ސަރުކާރުން ދަނީ އިންޑިއާ ސަރުކާރާ އެކު މަޝްވަރާ ކުރަމުންނެވެ.
އިންޑިއާގެ ޓްރިވެންޑްރަމާއި ބެންގަލޫރަކީ ދިވެހިން އެންމެ ގިނައިން ދަތުރު ކުރާ އިންޑިއާގެ ދެ ސަރަހައްދެވެ.