ފެންނަމުންދަނީ ޑިޕްލޮމަސީގައި ޅަ އަދި ތަޖުރިބާ ނެތް ސަރުކާރެއް ކަމަށް ވިދާޅުވެ ރައީސް ޑރ. މުހައްމަދު މުއިއްޒުގެ ސަރުކާރަށް އެމްޑީޕީގެ ރައީސް އަބްދުﷲ ޝާހިދު ފާޑުވިދާޅުވެއްޖެ އެވެ.
ރައީސް ޑރ. މުއިއްޒު އިންޑިއާއަށް ކުރައްވަމުން ގެންދަވާ ދަތުރުފުޅާ ގުޅިގެން ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ މިހާރު ފެނިގެންދަނީ ބައިނަލްއަގްވަމީ ގުޅުންތައް ދޮގާއި މަކަރާއި ހީލަތުގެ މައްޗަށް ބިނާކޮށްގެން ނުހިންގޭނެކަން ސަރުކާރަށް ވިސްނެމުންދާ މަންޒަރު ކަމަށެވެ.
ޝާހިދު ވިދާޅުވީ އިންޑިއާއާއެކު ކުރިން އޮތް ގާތް ގުޅުން އަނބުރާ ދިރުވަމުން އައުމަކީ އުފާވެރިކަމެއް ކަމަށާއި ކުރީގެ ރައީސް އިބްރާހިމް ސޯލިހުގެ ވެރިކަމުގައި ފެށި މަޝްރޫއުތައް ކުރިއަށް ގެންދިޔުމުން ހިތްވަރު ލިބޭ ކަމަށެވެ.
އެގޮތުން ޝާހިދު ވަނީ އިންޑިއާގެ ރުޕޭ ކާޑު ރާއްޖޭގައި ތައާރަފްކުރުމާއި، ހަނިމާދޫ އިންޓަނޭޝަނަލް އެއާޕޯޓުގެ ރަންވޭ އިފްތިތާހުކުރުމާއި، އެންޓި-ކޮރަޕްޝަން ކޮމިޝަން (އޭސީސީ) އާއި، ޖުޑީޝަލް ސާވިސް ކޮމިޝަން (ޖޭއެސްސީ) ހަރުދަނާ ކުރުމާއި އަދި ކުޅިވަރާއި ޒުވާނުންނާ ގުޅޭ އެމްއޯޔޫތައް ފާހަގަކުރައްވާފަ އެވެ.
"އިދިކޮޅުގައި ތިބެ މި ސަރުކަރުގެ ވެރިން ދެކޮޅު ހެދި އިންޑިއާގެ ކޮންސިއުލޭޓް އައްޑޫ ސިޓީގައި ގާއިމުކުރުމުގެ މަޝްވަރާތައް ކުރިއަށް ގެންދިއުމަށްވެސް. އެކަމަކު މިއަދު އެކަން ކުރާތީ ވެސް އުފާވޭ،" ޝާހިދު ވިދާޅުވި އެވެ.
ޝަހިދު އިތުރަށް ވިދާޅުވީ މި ސަރުކާރުގެ ވެރިން އިދިކޮޅުގައި ތިބެ ދެކޮޅު ހެދި ޔޫޓީއެފް މަޝްރޫއާ ގުޅިގެން ދިވެހި ސިފައިންގެ ގާބިލިއްޔަތުކަން އިތުރުކުރުމަށް އިންޑިއާއާ އެކު މަޝްވަރާތައް ކުރިއަށް ގެންދާތީ އުފާކުރައްވާ ކަމަށެވެ.
ޝާހިދު ވަނީ ދިވެހިންނާއެކު ސާބިތުވެ ދެމިއޮތީތީވެ އިންޑިއާއަށް ޝުކުރު ދަންނަވާފަ އެވެ. އަދި ދެ ގައުމުގެ ދެމެދުގައި މިހާރު އޮތް ގާތް ގުޅުން ކުރިއަށް އޮތް ތަނުގައިވެސް ދެމިއޮންނާނެ ކަމަށް އުއްމީދު ކުރައްވާ ކަމަށްވެސް ވިދާޅުވި އެވެ.