އާބަން ސެންޓަރުތައް ކަނޑައެޅިއިރު މަޝްވަރާކޮށްފައި ނުވާތީ އިދިކޮޅު އެމްޑީޕީގެ ރައީސް އަބްދުﷲ ޝާހިދު ކަންބޮޑުވުން ފާޅުކުރައްވައިފި އެވެ.
ޝާހިދު ކަންބޮޑުވުން ފާޅުކުރައްވާފައި މިވަނީ އާބަން ސެންޓަރުތަކުގެ ގޮތުގައި ސަރުކާރުން ތަރައްގީކުރަން ނިންމި ހަތް ރަށް މިރޭ އިއުލާންކުރިއިރު ރާއްޖޭގެ އެންމެ އުތުރާއި އެންމެ ދެކުނުގެ އެއްވެސް އަތޮޅެއްގެ އެއްވެސް ރަށެއް އާބަން ސެންޓަރުގެ ގޮތުގައި ތަރައްގީކުރަން ހިމަނާފައި ނުވާތީ އެވެ.
އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ އާބަން ސެންޓަރު ކަނޑައެޅުމުގައި ބޮޑުތިލަދުންމައްޗާއި ރާއްޖޭގެ ދެކުނުގެ ސަރަހައްދު އުނިވެފައިވާ ސަބަބު އެސަރަހައްދު ތަކުގައި ދިރިއުޅޭ ރައްޔިތުންނަށް ސަރުކާރުން ސާފުކޮށްދޭންޖެހޭނެ ކަމަށެވެ.
މިފަދަ ބޮޑެތި ނިންމުންތައް ސަރުކާރުން ނިންމުމުގެ ކުރިން ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ހޯދުމަކީ މުހިއްމު ކަމެއް ކަމުގައި ދެކެވަޑައިގަންނަވާ ކަމުގައިވެސް ޝާހިދު ވިދާޅުވި އެވެ.
"އާބަން ސެންޓަރުގެ ގޮތުގައި ރަށްތަކެއް ކަނޑައެޅުމުގެ މަގުސަދަކީ ލާމަރުކަޒީ ނިޒާމުން ރަށް ރަށް ހިންގުމުގެ ނިޒާމުން އެރަށްތައް ވަކިކޮށް މާލޭން ހިންގަން ފެށުން ކަމުގައިވެގެން ނުވާނެ،" ޝާހިދު ވިދާޅުވި އެވެ.
ޝާހިދުގެ ޕޯސްޓާ އަދި ބައެއް އާންމުންގެ ކަންބޮޑުވުމާ ގުޅިގެން ރައީސް ޑރ. މުހައްމަދު މުއިއްޒު ވަނީ އާބަން ސެންޓަރުގެ ގޮތުގައި ރަށްތަކެއް ކަނޑައަޅައި އިއުލާންކުރިއިރު ރާއްޖޭގެ އުތުރާއި ދެކުނު ހިމަނާފައި ނުވާ ސަބަބު ސާފުކޮށްދެއްވާފަ އެވެ.
އެގޮތުން ރައީސް ވިދާޅުވީ ރާއްޖޭގެ އެންމެ އުތުރުގެ އަތޮޅުތައް ކަމަށްވާ ހއ. ހދ. ށ އަދި ނ. އަތޮޅު ތަރައްގީ ކުރަނީ ނޮދަން އިންޓަގްރޭޓަޑް ޑިވެލޮޕްމަންޓް ޒޯނެއްގެ ގޮތުގައި ކަމަށެވެ. ހަމައެގޮތަށް ރާއްޖޭގެ އެންމެ ދެކުނުގެ ހަތަރު އަތޮޅު ކަމަށްވާ ގއ، ގދ، ފުވައްމުލައް އަދި އައްޑޫ ސިޓީ ތަރައްގީ ކުރަނީ ނޮދަން އިންޓަގްރޭޓަޑް ޑިވެލޮޕްމަންޓް ޒޯނެއްގެ ގޮތުގައި ކަމަށެވެ.
ރައީސް ވިދާޅުވީ އާބަން ސެންޓަރުތަކާއި އިންޓަގްރޭޓަޑް ޑިވެލޮޕްމަންޓް ޒޯންތައް ކަނޑައަޅައި އިއުލާންކޮށްފައިވަނީ އެމަނިކުފާނުގެ ރިޔާސީ މެނިފެސްޓޯ ލޯންޗްކުރިއިރު އޮތް ގޮތަށް ކަމަށެވެ. އާބަން ސެންޓަރުތަކާއި އިންޓަގްރޭޓަޑް ޑިވެލޮޕްމަންޓް ޒޯންތައް ތަރައްގީކުރާނީ ދެމެހެއްޓެނިވި ސަރަހައްދީ ތަރައްގީގެ ސިޔާސަތުގެ ދަށުން އެންމެ މަތީ ފަންތީގެ ހިދްމަތްތައް ހިމެނޭހެން ސަރުކާރުގެ ސިޔާސަތުތަކުގެ ތެރެއިން ތަރައްގީކުރާ ތަންތަނުގެ ގޮތުގައި ކަމަށެވެ.