ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދު ތާޖްމަހަލްއަށް ޒިޔާރަތްކުރައްވައިފި އެވެ.
އިންޑިއާގައި 17 ވަނަ ގަރުނުގައި ވެރިކަންކުރެއްވި ރަސްކަލެއް ކަމަށްވާ ޝާހް ޖަހާން އޭނާގެ އަންހެނުންގެ ހަނދާނުގައި ބިނާކުރެއްވި ތާޖްމަހަލް އަކީ ދުނިޔޭގެ ހަތް އަޖައިބުގެ ތެރޭގައިވެސް ހިމެނޭ ތަނެކެވެ.
ރައީސްގެ ދެކަނބަލުން ތާޖްމަހަލްއަށް ޒިޔާރަތް ކުރެއްވީ މިއަދު ހެނދުނުގެ ވަގުތެއްގައެވެ.
އިންޑިއާގެ އުއްތަރުޕްރެދޭޝް (ޔޫޕީ)ގައި އާގްރާގައި ހުންނަ ތާޖްމަހަލްއަށް ރައީސްގެ ދެކަނބަލުން ވަޑައިގަތުމުން މަރުހަބާ ދެންނެވީ ޔޫޕީގެ ޗީފް މިނިސްޓަރު ޔޮގެންދްރަ އާދިތުޔަނާތުގެ ފަރާތުން ސްޓޭޓް މިނިސްޓަރު ޔޮގެންދްރަ އުޕްދަޔާ އެވެ.
އިންޑިއާ އަށް ވަޑައިގަންނަވާ ބޭރު ގައުމުތަކުގެ ވެރިންނާއި އިއްޒަތްތެރިން ތާޖްމަހަލްއަށް ޒިޔާރަތް ކުރައްވާ ފޮޓޯ ނެންގެވުމަކީ ސަގާފީ ކަމެއްގެ ގޮތުގައި ހިނގަމުންދާ ކަމެކެވެ.
ރައީސްގެ ދެކަނބަލުން ފުރަމާނަ ދަތުރުފުޅެއްގައި އިންޑިއާއަށް ވަޑައިގެންނެވީ މިދިޔަ އާދިއްތަ ދުވަހު އެވެ.
މިމަހުގެ 10 ވަނަ ދުވަހަށް ކުރިއަށްދާ މިދަތުރުފުޅުގައި އިންޑިއާގެ ވެރިރަށް ނިއުދިއްލީގެ އިތުރުން މުމްބާއީ އަދި ބެންގަލޫރަށްވެސް ރައީސް ވަޑައިގަންނަވާނެ އެވެ.