ބާސެލޯނާ އަށް ކުޅެމުން އަންނަ ސްޕެއިންގެ ފޯވާޑް ފެރާން ޓޮރޭސްގެ ފައިގެ ފަލަމަސްގަނޑަށް ލިބުނު އަނިޔާގެ ސަބަބުން ދެ މަސް ދުވަހަށް ކުޅުމާ ދުރަށް ދާން ޖެހިއްޖެ އެވެ.
ފޭރާންއަށް އަނިޔާވީ މިދިޔަ އާދިއްތަ ދުވަހު ސްޕެނިޝް ލީގުގައި ޑިޕޯޓިވޯ އަލްވޭޒްއާ ދެކޮޅަށް ކުޅުނު މެޗުގަ އެވެ.
މި އަނިޔާގެ ސަބަބުން އުމުރުން 24 އަހަރުގެ ޓޮރޭސްއަށް ޔޫއެފާ ނޭޝަންސް ލީގުގައި ސްޕެއިން އިން މި ހަފްތާ އަދި އަންނަ ހަފްތާގައި ޑެންމާކާއި ސާބިޔާއާ ދެކޮޅަށް ކުޅޭ މެޗުތަކުގައި ބައިވެރިއެއް ނުވެވޭނެ އެވެ.
ބާސެލޯނާއަށް މި ސީޒަނުގައި އަނިޔާގެ މައްސަލަ ވަރަށް ބޮޑަށް ދިމާވެފައިވާއިރު، އަނިޔާވެފައިވާ އެހެން ކުޅުންތެރިންގެ ތެރޭގައި މާކް އެންދްރޭ ޓާ ސްޓެގަން، ޑެނީ އޮލޯ، ގަވީ، ފާމިން ލޮޕޭޒް، އެންދްރިއަސް ކްރިސްޓެންސެން އަދި ރޮނާލްޑް އަރައުހޯ ހިމެނެ އެވެ.
ބާސެލޯނާގެ ކޯޗް ހެންސީ ފްލިކް ވަނީ މި ސީޒަނުގެ ފުޓްބޯޅަ ކަލަންޑަރު އެކުލަވާލާފައިވާ ގޮތުގެ ސަބަބުން ކުޅުންތެރިންނަށް އެކަށީގެންވާ އަރާމު ނުލިބޭތީ އެކަމާމެދު ކަންބޮޑުވުން ފާޅުކޮށްފަ އެވެ.