ދުނިޔޭގެ އެންމެ ބޮޑު ޝިޕިންލައިން މެޑިޓެރޭނިއަން ޝިޕިން ކޮމްޕެނީ (އެމްއެސްސީ) ގެ ދަތުރުތައް ރާއްޖެއަށް ފަށައިފި އެވެ.
އެ ކުންފުނިން ރާއްޖެއައި ފުރަތަމަ ބޯޓަކީ "މަނާސާ އެފް" އެވެ. މި ބޯޓަށް މަރުހަބާ ކިޔުމަށް މާލޭ ވިޔަފާރި ބަނދަރުގައި މިއަދު މޯލްޑިވްސް ޕޯޓްސް ލިމިޓެޑް (އެމްޕީއެލް) އާއި އެމްއެސްސީގެ ލޯކަލް އޭޖެންޓު ސެންޗޫރިއަން ވަނީ ހާއްސަ ރަސްމިއްޔާތެއް ބާއްވާފަ އެވެ.
މަނާސާ އެފް މާލޭގައި ބަނދަރުކޮށްފައިވަނީ އިއްޔެ އެވެ. މި ބޯޓު ރާއްޖެއައުން ފާހަގަކުރުމަށް އިއްޔެ ވަނީ ވޯޓާ ސެލިއުޓެއްދީފަ އެވެ.
މާލޭ ވިޔަފާރި ބަނދަރުގައި މިއަދު ބޭއްވި ރަސްމިއްޔާތުގައި އެމްޕީއެލްގެ ސީއީއޯ މުހައްމަދު ވަޖީހު ވިދާޅުވީ އެމްއެސްސީގެ ބޯޓުން ޖެނެރަލް ކާގޯގެ 800 ކޮންޓެއިނަރު ރާއްޖެ ގެނެސްފައިވާ ކަމަށެވެ.
އޭނާ ވިދާޅުވީ އެމްއެސްސީން މި ފަށާ ދަތުރުތަކާއެކު ރާއްޖޭގެ ޝިޕިން ކޮންޓެއިނާ ބޯޓުތަކުގެ ހިދުމަތް އިތުރަށް ފުޅާ ކުރެވޭނެ ކަމަށާއި ގައުމުގެ ވިޔަފާރިއަށް ބޮޑެތި ކުރިއެރުންތަކެއް ލިބިގެންދާނެ ކަމަށެވެ.
އެމްއެސްސީގެ ދަތުރުތައް ރާއްޖެއަށް ފެށުމާއި ގުޅިގެން ބޭއްވި ރަސްމިއްޔާތުގައި ބޯޓު ދުއްވަން އިން ކެޕްޓަނަށް އެމްޕީއެލް އަދި ސެންޗޫރިއަން ވަނީ ހަނދާނީ ފިލައެއް ވެސް އަރުވާފަ އެވެ.
އެމްއެސްސީގެ ބޯޓުތަކުގައި ސިންގަޕޫރާއި އިންޑިއާ އަދި ސްރީލަންކާގެ ކޮލަމްބޯ އިން ރާއްޖެއަށް މުދާ ގެންނާނެ އެވެ.