ރައީސް ޑރ. މުހައްމަދު މުއިއްޒުގެ އިންޑިއާ ދަތުރުފުޅަކީ ވަރަށް ކާމިޔާބު ދަތުރުފުޅެއް ކަމަށާއި، އެ ދަތުރުފުޅުގައި ކުރެވޭ އެއްވެސް މަސައްކަތެއްގައި ރައްޔިތުންނަށް ފޮރުވަން ޖެހޭ އެއްވެސް ކަމެއް ނެތް ކަމަށް ހާރިޖީ ވަޒީރު ޑރ. ޢަބްދުﷲ ހަލީލު ވިދާޅުވެއްޖެ އެވެ.
އިންޑިއާގައި ހުންނަވައި މީޑިއާތަކަށް މައުލޫމާތު ދެއްވަމުން ހަލީލު ވިދާޅުވީ ރައީސް މުއިއްޒުގެ މި ދަތުރުފުޅުގައި ދެ ކަމެއް ފާހަގަކުރެވުނު ކަމަށެވެ.
މީގެތެރެއިން އެއް ކަމަކީ ރައީސްގެ ކެމްޕޭންގައި ދެއްކެވި ވާހަކަފުޅުތަކާ އެއްގޮތަށް، ރައްޔިތުންނަށް ރަނގަޅު ގޮތް ހޯދުމަށް މަސައްކަތް ކުރައްވަމުން ގެންދަވާ ކަމެވެ.
"ރައީސްގެ އަމާޒަކީ ދިވެހިން ފުރަތަމަ، ދިވެހި ގައުމު ފުރަތަމަ. އެހެންވީމާ ރާއްޖޭގެ ކަންކަން އެންމެ ކުރިއަށް ނެރުއްވައިގެން އެ މަނިކުފާނު ބޭރު ގައުމުތަކާއެކު މަސައްކަތްޕުޅު އެ ކުރައްވަނީ. އެއީ މި ދަތުރުފުޅު މިހާ ބޮޑަށް ކާމިޔާބުވުމުގެ އަސްލަކީ،" ހަލީލު ވިދާޅުވި އެވެ.
އިދިކޮޅު ޕާޓީގެ ގޮތުގައި ތިބިއިރު އިންޑިއާއާ ދެކޮޅަށް އަޑުއުފުލަން ޖެހުނީ އޭރުގެ ސަރުކާރުން ކޮށްފައި ހުރި ކަންތައްތަކުގެ ނަތީޖާ ދިވެހިން ތަހައްމަލް ކުރަމުންދިޔަ ގޮތްތަކުގެ ސަބަބުން ކަމަށްވެސް ހަލީލު ވިދާޅުވި އެވެ. ނަމަވެސް މިހާރު އިންޑިއާ ސަރުކާރާއެކު ވަރަށް އިހްލާސްތެރިކަމާއެކު މަސައްކަތްތައް ކުރިއަށް ގެންދެވޭ ކަމުގައިވެސް ވިދާޅުވި އެވެ.
ހަލީލް ވިދާޅުވީ ރައީސް މުއިއްޒަކީ ވިދާޅުވާ ގޮތަށް އަމަލުކުރައްވާނެ ބޭފުޅެއްކަން އިންޑިއާގެ އިސްވެރިންނަށްވެސް މިހާރު އެނގިވަޑައިގަންނަވާނެ ކަމަށެވެ. އެހެންކަމުން ދިވެހި ސަރުކާރަކީ ރައްޔިތުންގެ މަންފާއަށާއި އިންޑިއާއަށްވެސް ފައިދާވާ ގޮތަށް އަމަލުކުރާނޭ ސަރުކާރެއްކަން އިންޑިއާ ސަރުކާރުން ގަބޫލުކުރާތީ، ރައީސް މުއިއްޒަށް އެހާ ހޫނު މަރުހަބާއެއް ދެންނެވީ ކަމަށްވެސް ހިލީލު ވިދާޅުވި އެވެ.
"ފޮރުވާނެ އެއްވެސް ކަމެއް ނެތް މި ގުޅުމުގެ ތެރޭގައި. އިންޑިއާއަކީ ޒަމާނުއްސުރެ ރާއްޖެއާ އެންމެ ގާތްކޮށް އަބަދުވެސް މަސައްކަތްކުރާ ގައުމެއް. ރާއްޖެއަށް ދިމާވާ ކޮންމެ ހާލަތެއްގައި އެންމެ ބޮޑަށް އެހީތެރިވެދޭ އެއް ގައުމު،" ހަލީލު ވިދާޅުވި އެވެ.
މިނިސްޓަރު އިތުރަށް ވިދާޅުވީ މި ސަރުކާރުން ބޭނުންވަނީ ދެ ގައުމު ގުޅިގެން އިހްލާސްތެރި މަސައްކަތްތަކެއް ކުރަމުންދާކަން ރައްޔިތުންނަށް އަންގައިދިީ ބުނެދޭން ކަމަށެވެ. އަދި އިންޑިއާ ސަރުކާރާއެކު ކުރެވުނު މަޝްވަރާތަކުގައި "ވިޝަން ޑޮކިއުމަންޓު" ކިޔާ ލިޔުމެއް އެކުލަވާލެވުނު ކަމަށާއި، މިއީ ދެ ގައުމުން އެއްބަސްވެގެން ކުރެވުނު މަސައްކަތެއް ކަމަށްވެސް ހަލީލް ވިދާޅުވި އެވެ.