ސްނޯކްލިންއަށް ގޮސް އުޅުނު ފަތުރުވެރިއަކު މަރުވެއްޖެ

ސްނޯކްލިންއަށް ގޮސް އުޅުނު ފަތުރުވެރިއަކު މަރުވެއްޖެ އެވެ.

ފުލުހުން ބުނީ އއ. ގަންގެހި ރިސޯޓު ބޭރަށް ސްނޯކްލިންއަށް ގޮސް އުޅުނު ފަތުރުވެރިއަކު މަރުވެފައިވާ ކަމަށާއި އެ މައްސަލަ ފުލުހުންނަށް ރިޕޯޓުކޮށްފައިވަނީ އިއްޔެ 11:22 ހާއިރު ކަމަށެވެ.

މަރުވެފައިވަނީ 27 އަހަރުގެ ޗައިނާ ފިރެހެނެކެވެ. އޭނާއަކީ ރަސްދޫ ގެސްޓް ހައުސްއެއްގައި ޗުއްޓީ ހޭދަކުރަމުންދިޔަ މީހެކެވެ.

އެ ރިސޯޓުގައި ހުންނަ ހެލްތް ސެންޓަރަށް ހަވާލާދީ ފުލުހުން ބުނީ ސެންޓަރަށް ގެންދިޔައިރު ވެސް އޭނާ މަރުވެފައިވާ ކަމަށެވެ.

ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.

މީގެ ކުރިން ކ. އަތޮޅު ރިސޯޓެއްގައި ސްނޯކްލިން އަށް މޫދަށް ގޮސް އުޅުނު ރަޝިއާ ފަތުރުވެރިޔަކު ވެސް ވަނީ ގެނބިގެން މަރުވެފަ އެވެ. އެ މައްސަލައިގައި މަރުވެފައިވަނީ އުމުރުން 67 އަހަރުގެ ރަޝިއާ ފިރިހެނެކެވެ.