މުއައްސަސާތައް ހަދަމުން ހަދަމުން ގޮސް ކަންކަމުގައި ޒިންމާވާންޖެހޭ ފަރާތް ނޭނގޭ ހިސާބަށް ހާލަތު ގޮސްފައިވާ ކަމަށް ވިދާޅުވެ އެޓާނީ ޖެނެރަލް އަހްމަދު އުޝާމް ފާޑުވިދާޅުވެއްޖެ އެވެ.
ރައިސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން އެޓާނީ ޖެނެރަލް ވިދާޅުވީ ފަސް ލައްކައެއްހާ މީހުން ދިރިއުޅޭ ގައުމެއްގައި މުއައްސަސާތައް ގިނަވެ، ސަރުކާރުގެ ކުންފުންޏެއްގެ ކަމެއްގައި ސަރުކާރަށް ބަސް ނުބުނެވޭ ހިސާބަށް ހާލަތު ގޮސްފައިވާ ކަމަށެވެ. އެގޮތުން މުއައްސަސާތަކާއި މިނިވަން އިދާރާތައް ހަދަމުން ގޮސް ކުންފުނީގެ ކަންކަމުގައި ބަސް ބުނާނީ މިނިސްޓްރީތޯ، ސަރުކާރު ތޯ ނުވަތަ ޕްރައިވަޓަައިޒޭޝަން އެންޑް ކޯޕޮރަޓައިޒޭޝަން ބޯޑު (ޕީސީބީ)ތޯ ނޭނގޭ ހިސާބަށް ކަންކަން ގޮސްފައިވާ ކަމަށް ވިދާޅުވި އެވެ.
"ޕީސީބީން ބަލާނެ ކަމަށް އެއްބަޔަކު ތިބެނީ، މިނިސްޓްރީން ބަލާނެ ކަމަށް އަނެއް ބަޔަކު ތިބެނީ،" އުޝާމް ވިދާޅުވީ އެވެ.
އޭނާ ވިދާޅުވީ ގާނޫނުތައް އުފެދުމުގެ މަގުސަދު ހާސިލުނުވާ މިންވަރަށް ކަންކަން ގޮސްފައިވާ ކަމަށާއި ސަރުކާރުގެ ކުންފުނިތައް ރަނގަޅަށް ނުހިންގެނީ ވެސް އެ ސަބަބާ ހެދި ކަމަށެވެ. އަދި ވޭތުވެދިޔަ އަހަރުތަކުގައި ސަރުކާރު ކުންފުނިތަކުގެ ކޮރަޕްޝަންގެ މައްސަލަތައް އިންތިހާއަށް މައްޗަށް ދިޔަ އިރު އެކަން ބެލޭނެ ގޮތެއް ނެތް ކަމަށްވެސް އޭނާ ވިދާޅުވި އެވެ.
"މިފަދަ ތަންތަން ބެހެއްޓުމަކީ ހަމަ ކުރަންޖެހޭ ކަމެއްތޯ؟ ސަރުކާރުގެ ކުންފުނިތައް ރެގިއުލޭޓުކުރުމަށްޓަކައި ވަކިން ތަނެއް ހަދައިން އުޅުމަކީ ހަމަ ކުރަން ޖެހޭ ކަމެއްތޯ؟" އުޝާމް ސުވާލުކުރެއްވި އެވެ.
އޭޖީ ވިދާޅުވީ މީގެ ކުރިން ފިނޭންސް މިނިސްޓްރީގެ ދަށުން ސަރުކާރު ކުންފުނިތަކުގެ ކަންކަން ބަލަހައްޓަމުން ދިޔައިރު އެކަން މާރަނގަޅަށް ކުރެވުނު ކަމަށެވެ. އަދި އެފަދަ މުއައްސަސާތައް ބެހެއްޓުމުގައި ހުރި ފައިދާއާއި ގެއްލުންތައް ބެލުމަށްފަހު ގާނޫނަށް އިސްލާހު ގެންނަން ޖެހިއްޖެ ހާލަތެއްގައި އެކަންސް ކުރުމަށް ތައްޔާރަށް ހުންނެވި ކަމަށް އުޝާމް ވިދާޅުވި އެވެ.
ސަރުކާރުގެ ކުންފުނިތަކާ ބެހޭ ގޮތުން ކުރި ސުުވާލަށް ޖަވާބު ދެއްވަމުން ފިނޭންސް މިނިސްޓަރު މޫސާ ޒަމީރު ވިދާޅުވީ ސަރުކާރުގެ ކޮންމެ ކުންފުންޏެއްގެ ހިސާބުތައް ނިންމާނީ ރާއްޖޭގައި ޗާޓެޑް އެކައުންޓެންޓެއްގެ ލައިސެންސެއް އޮންނަ ފަރާތަކަށް ހެދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ މަޝްވަރާކޮށް، އުސޫލުތަކެއް ކަނޑައަޅަމުން ގެންދާ ކަމަށެވެ.
"ކޮންމެ އެސްއޯއީތަކުން ވެސް ޖެހޭނެ އެކައުންޓެންޓެއް ބަހައްޓައިގެން އޮޑިޓް ކުރެވޭނެ ނިޒާމެއް ރާވަން،" ޒަމީރު ވިދާޅުވި އެވެ.
މިނިސްޓަރުވެސް ވިދާޅުވީ ގާނޫނީ ގޮތުން ސަރުކާރުގެ ކުންފުނިތަކުގެ އޮޑިޓްކުރުމުގައި ފުށުއެރުންތަކެއް އެބަހުރި ކަމަށާއި އެކަންކަން ރަނގަޅުކުރުމުގެ މަސައްކަތް ކުރަމުން ގެންދާ ކަމަށެވެ. އަދި ގާނޫނުއަސާސީގައިވާ ގޮތަށް ގާނޫނީ އެސެޓް ބަލަހައްޓަންޖެހޭ މީހުން އެތަންތަން ބަލަހައްޓާ، ޒިންމާދާރުކުރެވޭނެ ނިޒާމެއް ގާއިމުކުރާނެ ކަމަށެވެ.