ޔުނައިޓެޑް އަރަބް އެމިރޭޓްސްގެ ރައީސް ޝައިޚް މުހައްމަދު ބިން ޒައިދު އައްނަހްޔާން ރަޝިއާއަށް ވަޑައިގެން މޮސްކޯގައި ރައީސް ޕޫޓިންއާ ބައްދަލުކުރައްވައިފި އެވެ.
ޔޫއޭއީގެ ވަފުދުގައި ހާރިޖީ ވަޒީރު ޝައިޚް އަބްުދުﷲ ބިން ޒައިދު އައްނަހްޔާން އާއި ސްޕްރީމް ކައުންސިލްގެ ސެކްރެޓަރީ ޖެނެރަލް އަލީ ހައްމަދު އައްޝަމްސީ، އިންޑަސްޓްރީ، ޓެކްނޮލޮޖީ ވަޒީރު ސުލްތާން އަހްމަދު އައަޖަބަރު، ބޭރު ވިޔަފާރިއާ ބެހޭ ވަޒީރު ސާނީ ބިން އަހްމަދު އައްޒަޔޫދީ އަދި މުހައްމަދު އަލައްބާރު ހިމެނިވަޑައިގަންނަވަ އެވެ.
ޝައިޚް މުހައްމަދު ބިން ޒައިދު އައްނަހްޔާން ރަޝިއާއަށް ކުރައްވާ މި ދަތުރަކީ ބްރިކްސްގެ އަހަރީ ސަމިޓްގައި ބައިވެރިވެވަޑައިގަތުމަށް ކުރައްވާ ދަތުރެކެވެ.
މި ސަމިޓް އޮންނާނީ ރަޝިއާގެ ފަސްވަނައަށް އެންމެ ބޮޑު ސިޓީ، ކަޒާންގައި މި މަހު 22-24 އަށެވެ.
ކަޒާންއަށް ވަޑައިގަތުމުގެ ކުރިން ޔޫއޭއީގެ ރައީސް އާއި ރަޝިއާގެ ރައީސް ނުރަސްމީ ބައްދަލުވުންތަކެއް ބާއްވަވާނެ އެވެ. މި ބައްދަލުވުންތައް ބާއްވަން ހަމަޖެހިފައިވަނީ ޕޫޓިންގެ އަމިއްލަ ގެކޮޅުގައި، އާއިލާގެ ބައެއް މެމްބަރުންގެ ހާޒިރުގަ އެވެ.
ރަޝިއާ އާއި ޔޫއޭއީއާ ދެމެދު ކުރެވޭ ރަސްމީ މަޝްވަރާތައްވެސް ބްރިކްސް ސަމިޓަށްވުރެ ކުރިން އޮންނާނެ ކަމަށް ހަބަރުތައް ބުނެ އެވެ.
ދެ ރައީސުންގެ މަޝްވަރާތަކުގައި މެދުއިރުމަތީގެ ހާލަތަށް އަލިއަޅުއްވާލައްވާނެ އެވެ. އަދި ދުނިޔޭގައި ބަދަލުވަމުންދާ ސިޔާސީ އޮއިވަރަށްވެސް ބައްލަވާލައްވާނެ އެވެ.
ޔުކްރޭން ހަނގުރާމައާ ބެހޭ ގޮތުން ރަޝިއާގެ ރައީސް ޔޫއޭއީގެ ރައީސަށް މައުލޫމާތު ދެއްވާނެ ކަމަށް ރަޝިއާގެ ރިޔާސީ ގަނޑުވަރުގެ ތަރުޖަމާން ދިމިތުރީ ޕެސްކޯފް ވިދާޅުވި އެވެ.
ރަޝިއާގެ ކަޒާންގައި މި އަހަރު އޮންނަ އަހަރީ ސަމިޓުގައި -- ބްރިކްސް ގައުމުތަކަށް މުހިންމު ނިންމުންތަކެއް ނިންމަވާނެ ކަމަށް ބުނެވެ އެވެ.
ބްރިކްސްގެ އަހަރީ ސަމިޓްގައި ޗައިނާގެ ރައީސް ޝީ ޖިންޕިން، އިންޑިއާގެ ބޮޑުވަޒީރު ނަރެންދުރަ މޯދީވެސް ބައިވެރިވެވަޑައިގަންނަވާނެ އެވެ.
ރިޕޯޓްތައް ބުނާ ގޮތުން މި ސަމިޓްގައި ބްރެޒިލްގެ ރައީސް ލޫލާއަށް ބައިވެރިވެވަޑައި ނުގަނެވޭނެ އެވެ. އެއީ ލޫލާގެ ބޮލަށް ލިބިވަޑައިގެންފައި ހުރި ޒަަހަމެއްގެ ސަބަބުން އޭނާއަށް ދަތުރުކުރަން ހުއްދަ ނެތުމުންނެވެ.
ބްރިކްސް ސަމިޓަށް ހުރި ބޮޑެތި ނިންމުންތަކުގެ ތެރޭގައި އެމެރިކާ ޑޮލަރުގެ ބަދަލުގައި ބޭނުންކުރާނެ ފައިސާއެއް ކަނޑައެޅުން ހިމެނެ އެވެ. އަދި ބްރިކްސް ގައުމުތަކުގެ މެދުގައި ހުރިހާ މެމްބަރުންނަށް އެއްބަސްވެވޭ މާލީ ނިޒާމެއް ތައާރަފުކުރުން އޮންނާނެ އެވެ.