ރެއާލް މެޑްރިޑްގެ ތަޖުރިބާކާރު ޑިފެންޑަރު ޑެނީ ކާވަހާލްގެ ކަކުލަށް ލިބުނު ބޮޑު އަނިޔާއާ ގުޅިގެން މި ސީޒަނުގައި އިތުރަށް ނުކުޅެވޭނެ ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.
ވިޔަރެއާލްއާ ދެކޮޅަށް ކުޅުނު މެޗުގައި ކާވަހާލްގެ ކަކުލުގެ އޭސީއެލް އަށް ލިބުނު އަނިޔާއާ ގުޅިގެން އޮޕަރޭޝަނެއް ކުރަން ޖެހުނެވެ. އެހެންނަމަވެސް ރިހެބިލިޓޭޝަން ފެށިތާ މާގިނަ ދުވަހެއް ނުވަނީސް ކާވަހާލް ވަނީ ރެއާލްގެ ޓްރެއިނިން ދަނޑުގައި އަލުން ފެނިފަ އެވެ.
ސްޕެއިންގެ މީޑިއާ ރިޕޯޓުތައް ބުނާ ގޮތުގައި އަންޗެލޮޓީ ވަނީ ކާވަހާލްއަށް ހާއްސަ ރޯލެއް ދިނުމަށް ނިންމާފަ އެވެ. އެގޮތުން ޓީމު މޯޓިވޭޓް ކުރުމާއި، ކޯޗިން ސްޓާފުންނަށް އެހީތެރިވުމުގެ މަސްއޫލިއްޔަތު އޭނާއާ ހަވާލުކުރެވޭނެ އެވެ.
މީގެ އިތުރުން މިއީ ކާވަހާލްއަށް ކޯޗިން ކެރިއަރެއް ފެށުމަށް މުހިއްމު ތަޖުރިބާތަކެއް ލިބޭނެ ފުރުސަތެއްގެ ގޮތުގައިވެސް އަންޗެލޮޓީ ދެކެ އެވެ.
އުމުރުން 32 އަހަރުގެ ކާވަހާލްއަކީ ރެއާލް މެޑްރިޑްގެ ބީ ޓީމުން ފެށިގެން މިދިޔަ 11 އަހަރު އެ ކުލަބުގައި އެންމެ މުހިއްމު އެއް ރޯލު އަދާކުރި ކުޅުންތެރިޔާ އެވެ. އަދި މިދިޔަ އަހަރު ސްޕެއިނަށް ޔޫރޯ ހޯދައިދިނުމުގައިވެސް އޭނާގެ ދައުރު ފާހަގަކޮށްލެވެ އެވެ.