ރާއްޖެއަށް އިމްޕޯޓުކުރާ ބައެއް މުދަލުން ކަސްޓަމްސް އިން ޑިއުޓީ މައާފްކުރުމުގެ ސަބަބުން ދައުލަތުގެ އާމްދަނީއަށް ގެއްލުންވާތީ އެ އުސޫލު މުރާޖައާކުރަންޖެހޭ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހްސާން ވިދާޅުވެއްޖެ އެވެ.
ގައުމީ ތަފާސްހިސާބުގެ ދުވަސް ފާހަގަކުރުމަށް ކަސްޓަމްސްގައި ބޭއްވި ޖަލްސާގައި ވާހަކަދައްކަވަމުން މިނިސްޓަރު ވިދާޅުވީ ރާއްޖެއަށް އެތެރެކުރާ މުދަލުގެ ޑިއުޓީން 50 ޕަސަންޓް އިސްތިސްނާވުމުގެ ސަބަބުން ދައުލަތުގެ އާމްދަނީއަށް ގެއްލުންވާ ކަމަށެވެ.
މިނިސްޓަރު ވިދާޅުވީ ޑިއުޓީގެ ގޮތުގައި ހަތަރު ބިލިއަން ރުފިޔާ ނަގާއިރު އެއް ބިލިއަން ރުފިޔާ މައާފުކުރާ ކަމަށާއި ދައުލަތުގެ އާމްދަނީ އިތުރުކުރުމަށްޓަކައި އެ އުސޫލަށް ބަދަލު ގެންނަން ޖެހޭ ކަމަށެވެ.
"މި ތަފާސްހިސާބުން އެނގިގެން ގޮސްފި ޑިއުޓީ މައާފުކުރުމުގައި މުރާޖައާ ކުރަންޖެހޭ ކަންތައްތަކެއް ހުރިކަން," މިނިސްޓަރު ވިދާޅުވި އެވެ.
އިހްސާން ވިދާޅުވި ގޮތުގައި ވިޔަފާރިތަކަށް ބުރަނުވާހެން އާމްދަނީ އިތުރުކުރާނެ ސިޔާސަތުތަކެއް އެކުލަވާލަން ޖެހެ އެވެ.
ރައްޔިތުންނަށް ދަތި ނުވާނޭހެން ސަރުކާރުން މިހާރުވެސް ދަނީ ރާއްޖޭގެ އިގްތިސާދަށް ނަފާ ލިބޭނެ ގޮތަށް އިމްޕޯޓު ޑިއުޓީއަށް ބަދަލު ގެނައުމުގެ މަސައްކަތްތަކެއް ދަނީ ކުރަމުންނެވެ. އެގޮތުން ކަސްޓަމްސް އިން ވަނީ ދަތުރުވެރިން ގެންނަ ތަކެއްޗާއި އަމިއްލަ މީހުން ކުދި ކުދި ބޭނުންތަކަށް ގެންނަ ތަކެތިން ޑިއުޓީ މައާފްވާ މިންވަރު 10،000 ރުފިޔާ އަށް ބަދަލުކޮށްފަ އެވެ.