ރާއްޖޭގައި ވޭޕް އާންމުވީ ކުރީ ސަރުކާރުތަކުން އެކަމާބެހޭ ކަންކަން ރެގިއުލޭޓް ނުކުރުމުން ކަމަށް ރައްޔިތުންގެ މަޖިލީހުގެ ނައިބް ރައީސް އަދި ދިއްގަރު ދާއިރާގެ މެމްބަރު އަހްމަދު ނާޒިމް ވިދާޅުވެއްޖެ އެވެ.
ވޭޕް މަނާކުރުމާ ހަމައަށް ވޭޕްއާއި ސިންގިރޭޓުން ނަގާ ޑިއުޓީ ބޮޑުކުރުމަށް މަޖިލީހަށް ހުށަހަޅާފައިވާ ބިލަށް ބަހުސްކުރައްވަމުން ނާޒިމް މިއަދު ވިދާޅުވީ ދުންފަތް ކޮންޓްރޯލް ކުރުމާބެހޭ ގަނޫނާ އެއްގޮތަށް ކުރީ ސަރުކާރުތަކުން ވޭޕް ރެގިއުލޭޓް ކޮށްފައިނުވާ ކަމަށާއި ވޭޕް ބޭނުންކުރުން އެހާ އާންމުވެގެން ދިޔައީ އެކަމުގެ ސަބަބުން ކަމަށެވެ.
ނާޒިމް ވިދާޅުވީ 2010ގެ ކުރިން ވޭޕަކީ ކޮން އެއްޗެއްކަން މީހުންނަށް ނޭނގޭ ކަމަށާއި މީހުންގެ ތެރޭގައި ވޭޕް ފެތުރިގެން ދިޔައީ އެއަށްފަހު ކަމަށެވެ.
ވޭޕް އެތެރެކޮށްފައިވާ މިންވަރުގެ ތަފާސްހިސާބުތަކެއް ހިއްސާކުރައްވަމުން ނާޒިމު ވިދާޅުވީ 2021 ވަނަ އަހަރު 250،000 ވޭޕިން ޑިވައިސް އެތެރެކޮށްފައިވާ ކަމަށާއި 2023 ވަނަ އަހަރު 390،000 ވޭޕިން ޑިވައިސް އެތެރެކޮށްފައިވާ ކަމަށެވެ.
ނާޒިމް ވިދާޅުވީ މިއަހަރުގެ މިހާތަނަށްވެސް 253،000 ވޭޕިން ޑިވައިސް އެތެރެކޮށްފައިވާ ކަމަށެވެ. އަދި ވޭޕް އެހާ ބޮޑަށް ފެތުރިގެން ދިޔައީ އޭގެއިން ދައްކަންޖެހޭ ޓެކްސްއަށް މަކަރު ހަދައި އަގުހެޔޮކޮށް ވޭޕް ވިއްކޭނެ ގޮތްތައް މަގުފަހިވެފައިވާތީ ކަމަށްވެސް ވިދާޅުވި އެވެ.
ރާއްޖެއިން ބޭރުގެ ގައުމުތަކުގައި ވޭޕުން ޓޭކްސް ނަގަނީ ކޮންމެ މިލިގްރާމަކަށް ވަކި ރޭޓަކުންނެވެ. ނާޒިމް ވިދާޅުވީ ރާއްޖޭގައި ވެސް އެފަދައިން އަމަލުނުކުރުމުން ވޭޕް އާންމުވީ ކަމަށެވެ.
ނާޒިމް ވަނީ ރާއްޖޭގައި ވޭޕް މަނާކުރުމަށް ސަރުކާރުން ނިންމާފައިވާ ނިންމުމަށް މަރުހަބާ ވިދާޅުވެފަ އެވެ. ނަމަވެސް ސިނގިރޭޓް ފަދަ ތަކެތިން ނަގާ ޓެކްސް ބޮޑުކުރުމުން ކަޅު ބާޒާރުގައި އަގުހެޔޮކޮށް ސިނގިރޭޓު ވިއްކައި، އެފަދައިން ވިއްކާ ސިނގިރޭޓުގެ ކޮލިޓީ ދަށްވުމަކީ ދިމާވެދާނެ މައްސަލައެއް ކަމަށްވެސް ވިދާޅުވި އެވެ.