އިޓަލީގެ ބޮޑުވަޒީރު ޖިއޯޖިއާ މެލޯނީ އާއި އޭނާގެ ގާތް ބަޔަކަށް އިޒްރޭލުގެ އިންޓެލިޖެންސް އޭޖެންސީ މޮސާދުން ޖާސޫސީ ކުރިކަން ފަޅާއަރައިފި އެވެ.
މައްސަލަ ފެންމަތިވުމާ އެކު ތުހުމަތުކުރެވޭ ހަތަރު މީހަކު ހައްޔަރުކޮށްފައިވާ ކަމަށް އިޒްރޭލުގެ ނޫސް "ޔެދިއޮތް އަހަރޮނޮތު" އިން ރިޕޯޓްކޮށްފައިވެ އެވެ.
މި މައްސަލައިގެ ތަފްސީލް އަދި ސާފުވެފައި ނުވި ނަމަވެސް މިކަން ހިނގާފައިވަނީ ފާއިތުވި އަހަރުގެ ތެރޭގައި ކަމަށް ބެލެވެ އެވެ.
އިޓަލީގެ ފުރަތަމަ އަންހެން ބޮޑުވަޒީރު މެލޯނީ އަށް އިޒުރޭލުން ޖާސޫސްކުރިކަން ފަޅާއެރުމާ ގުޅިގެން ދެ ގައުމުގެ ގުޅުމަށް އަސަރުކުރާނެ ކަމެއް ކަމަށް ސިޔާސީ މަސްރަހު ދިރާސާކުރާ މީހުން ބުނެ އެވެ.
އިޒްރޭލުގެ ސަރުކާރުން މި މައްސަލައާ ގުޅޭ ގޮތުން އަދި ރަސްމީ ގޮތުން އެއްވެސް ވާހަކައެއް ނުދައްކަ އެވެ. އަދި އިޓަލީގެ ސަރުކާރުންވެސް މިކަމާ ގުޅޭ ގޮތުން ރަސްމީކޮށް އެއްޗެއް ނުބުނެ އެވެ.
އެހެންނަމަވެސް މި މައްސަލައިގެ ތަހުގީގު ކުރިއަށްދާ ކަމަށާއި އިތުރު މައުލޫމާތު ލިބުމުން ހާމަކުރާނެ ކަމަށް އިޓަލީގެ ފުލުހުން ބުނެފައިވެ އެވެ.