އިލެކްޝަންސް ކޮމިޝަން (އީސީ) އާއި އެންޓި ކޮރަޕްޝަން ކޮމިޝަން (އޭސީސީ)ގެ ރައީސް އާއި ނައިބް ރައީސް އަކީ ރައީސުލްޖުމްހޫރިއްޔާ އައްޔަންކުރާ މަގާމަކަށް ހެދުމަކީ ބަޔަކު ފާޑުކިޔަންޖެހޭ ކަމެއް ނޫން ކަމަށް ރައްޔިތުންގެ މަޖިލީހުގެ ނައިބް ރައީސް އަހްމަދު ނާޒިމު ވިދާޅުވެއްޖެ އެވެ.
ރައްޔިތުންގެ މަޖިލީހުގައި މިއަދު މިވަގުތު ބަހުސް ކުރަމުން ދަނީ އީސީ އާއި އޭސީސީގެ ރައީސް އާއި ނައިބް ރައީސް އަކީ ރައީސުލްޖުމްހޫރިއްޔާ އައްޔަންކުރާ މަގާމަށް ހެދުމަށް އެ ދެ އިދާރާގެ ގާނޫނަށް އިސްލާހު ގެނައުމަށް މަޖިލީހަށް ހުށަހަޅާފައިވާ ބިލްގެ ބަހުސްގައެވެ. މިވަގުތު ބަހުސް ކުރަމުންދަނީ އޭސީސީގެ ގާނޫނަށް ފެލިދޫ ދާއިރާގެ މެންބަރު އާދަމް ޒާހިރު ހުށަހެޅުއްވި އިސްލާހަށެވެ.
ބަހުސްގައި ނާޒިމް ވިދާޅުވީ އޭސީސީ ފަދަ މިނިވަން މުއައްސަސާތަކުގެ ރައީސުން މީގެކުރިންވެސް ރައީސުލްޖުމްހޫރިއްޔާ އައްޔަންކުރައްވާ ބޭފުޅެއްގެ ގޮތުގައި ހަމަޖައްސާފައިވާ ކަމަށެވެ. އެގޮތުން ސީއެސްސީގެ ރައީސް އަކީ މިއަދު ރައީސުލްޖުމްހޫރިއްޔާ އައްޔަންކުރައްވާ ބޭފުޅެއް ކަމަށާއި ސީއެސްސީގެ ރައީސް އަކީ މިނިވަން މުއައްސަސާއެއް ކަމަށްވާ ޖުޑިޝަލް ސާވިސް ކޮމިޝަން (ޖޭއެސްސީ)ގައިވެސް އިންނަވާ މެންބަރެއް ކަމަށް ވިދާޅުވި އެވެ.
"އޭސީސީގެ ރައީސް މިގޮތަށް ހޮވާ އިޖުރާއަތު ބަދަލުކުރަން ގާނޫނަށް އިސްލާހު ހުށަހަޅާފައި އޮތް ގޮތަކީ އަލަށް ގެންނަ ބަދަލެއް ނޫން،" ނާޒިމު ވިދާޅުވި އެވެ.
އޭނާ ވިދާޅުވީ އޭސީސީ އިން އެ ކޮމިޝަނާ ހަވާލުކޮށްފައިވާ ކޮރަޕްޝަންގެ މައްސަލަތައް ބެލުމަށް އެކަށީގެންވާ ވަރާ ގާތަށްވެސް މަސައްކަތް ކުރާ ކަމަށް ރައްޔިތުން ގަބޫލުނުކުރާ ކަމަށެވެ. އަދި އޭސީސީގެ ރައީސް، ރައީސުލްޖުމްހޫރިއްޔާ އައްޔަންކުރާ ގޮތް ހެދުމަށް މަޖިލީހުން މިއަދު މަސައްކަތް ކުރާއިރު އެމްޑީޕީގެ ފާޑުކިޔުން އަމާޒުވާތީ ނާޒިމު ވަނީ އެކަމަށް ރައްދުވެސް ދެއްވާފަ އެވެ. އެގޮތުން ވިދާޅުވީ އެމްޑީޕީގެ ވެރިކަމުގައި އޭސީސީގެ ހުރިހާ މެންބަރުން ބަދަލުކޮށްފައިވާ ކަމަށެވެ.
އޭސީސީ އަށް ވެސް ނާޒިމު ވަނީ ވަރަށް ބޮޑަށް ފާޑު ވިދާޅުވެފަ އެވެ. އެގޮތުން ވިދާޅުވީ އޭސީސީގެ މެންބަރުން ހިހޫތަނުން ކާލައިގެން ތިބެން ދޫކޮށްލައިގެން ނުތިބެވޭނެ ކަމަށެވެ. އޭސީސީގެ މެންބަރުން ޒިންމާ އަދާ ނުކުރައްވާތީ ރާއްޖޭގައި ކޮރަޕްޝަންގެ މައްސަލަތަކާއި ނާޖައިޒު މުއްސަނދިކަން ހޯދުން ވަރަށް ބޮޑަށް އިތުރުވެފައިވާ ކަމަށްވެސް ވިދާޅުވި އެވެ.
"އެ ކޮމިޝަނަށް ކޮރަޕްޝަން ހުއްޓުވޭ ތަނެއް ނުފެނޭ. މައްސަލަތައް މަދުވާ ތަނެއްވެސް ނުފެނޭ،" ނާޒިމު ވިދާޅުވި އެވެ.
މަޖިލީހަށް ހުށަހަޅާފައިވާ އިސްލާހުގައިވާ ގޮތުން އޭސީސީއާއި އީސީގެ ރައީސަކު ނުވަތަ ނައިބު ރައީސަކު އައްޔަންކުރަން ބޭނުންވާ ކޮންމެ ފަހަރަކު ކޮމިޝަނަށް އައްޔަންކުރެވޭ މެންބަރުންގެ ތެރެއިން މީހެއް ނުވަތަ މީހުންގެ ނަން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅަން ޖެހެ އެވެ.
ރައްޔިތުންގެ މަޖިލީހަށް ރައީސުލްޖުމްހޫރިއްޔާ ހުށަހަޅާ ނަންތަކުގެ ތެރެއިން ރައްޔިތުންގެ މަޖިލީހުގެ ޖަލްސާއެއްގައި ހާޒިރުވެ ވޯޓުގައި ބައިވެރިވި މެންބަރުންގެ އަގުލަބިއްޔަތުން ފާސްކުރާ މީހަކު، ކޮމިޝަނުގެ ރައީސްކަމުގެ މަގާމަށް ނުވަތަ ނައިބް ރައީސްކަމުގެ މަގާމަށް ރައީސުލްޖުމްހޫރިއްޔާ އައްޔަންކުރަންވާނެ ކަމަށްވެސް އިސްލާހުގައިވެ އެވެ.