އެމެރިކާގެ ދިފާއީ އިދާރާ ޕެންޓަގަނުން، ނިއުކްލިއާ ބޮންއަޅާ ބޯޓުތަކެއް މެދުއިރުމައްޗަށް ފޮނުވައިފި އެވެ.
މިއީ ޕެންޓަގަނުން މީގެ ކުރިން މެދުއިރުމައްޗަށް ފޮނުވި ފައިޓަރު ޖެޓު އުފުލާ މަނަވަރުތައް އެމެރިކާއަށް ގެންދިއުމަށް މަގުފަހިކުރުމަށް ހިންގާ ހަރަކާތެކެވެ.
ޕެންޓަގަނުން ބުނި ގޮތުން މަތިންދާބޯޓު އުފުލާ މަނަވަރުތައް އެމެރިކާގެ ބަނދަރުތަކަށް ގެންދިއުމަކުން މެދުއިރުމަތީގައި އެމެރިކާގެ ބާރުވެރިކަން ކުޑައެއް ނުވާނެ އެވެ. އަދި އިޒުރޭލަށް ރައްކާތެރިކަން ދިނުމަށް ކޮންމެ ފަދަ އާލާތެއް ބޭނުންކުރަން ޖެހުނަސް، އެމެރިކާ އޮންނާނީ އެކަމަކަށް ތައްޔާރަށެވެ.
އެމެރިކާއިން މެދުއިރުމައްޗަށް އިތުރުކުރާ އަސްކަރީ ގާބިލުކަމުގެ ތެރޭގައި ބެލިސްޓިކް މިސައިލާއި ޓޭންކާ އެއާކްރާފްޓް ހިމެނެ އެވެ. އަދި މިސައިލުން ދިފާއުކޮށްދޭ ނިޒާމުތަކާއި ހަނގުރާމައަށް ފޫގަޅާފައި ތިބި ސިފައިން ވެސް ހިމެނެ އެވެ.
އެމެރިކާއިން މިހާ ބޮޑަށް ތައްޔާރު މިވަނީ އީރާނަށް ހަމަލާދޭން ޖެހިއްޖެ ހިނދެއްގައި، އީރާނަށް ހިރިނުލެވޭ ވަރުގެ ހަމަލާތަކެއް ދިނުމަށެވެ.
ޕެންޓަގަނުން އީރާނަށް ދިން އިންޒާރުގައި ބުނެފައި އޮތީ ޅައެއްޗެއް ނޭޅުމަށެވެ. އެމެެރިކާ އެ ބުނާ ޅައެއްޗަކީ އެމެރިކާގެ ސިފައިންގެ މީހަކަށް ނުވަތަ މެދުއިރުމަތީގައި އެމެރިކާގެ ޝައުގުވެރިކަން އޮތް ބިމަކަށް ހަމަލާ ނުދިނުމެވެ.
އީރާނުން އޮޅިގެން ނަމަވެސް އިޒުރޭލަށް ހަމަލާދީފިނަމަ އެ މަންޒަރުގެ ތެރެއަށް އެމެރިކާ ވަންނާނެ ކަމަށް އޮތީ ބުނެފަ އެވެ.
ހަނގުރާމައިގައި އެމެރިކާ ބައިވެރިކުރުމާއި ނުކުރުން އޮތީ އީރާންގެ އިހްތިޔާރުގައި ކަމަށްވެސް ޕެންޓަގަނުން ބުންޏެވެ. އެ ފުރުސަތު އެމެރިކާއަށް ދީފިނަމަ މަންޒަރު ކުރަހާނީ އީރާންއަށް ތަރުޖަމާކުރަން ނޭނގޭހާ ތަފްސީލުކޮށް ކަމަށް ޕެންޓަގަނުން ބުންޏެވެ.
މެދުއިރުމަތީގައި މިހާރު ހާލަތު އޮތް ގޮތުން އިރާނުން އިޒުރޭލަށް އަނެއްކާވެސް ހަމަލާތަކެއް ދީފާނެ ކަމަށް ބެލެވެ އެވެ. އީރާން ބުނާ ގޮތުން މި ފަހަރުގެ ހަމަލާތަކުގައި އީރާނުގެ ތާއީދު އޮތް ހަނގުރާމަވެރި ގުރޫޕްތަކުން ވެސް ބައިވެރިވާނެ އެވެ. އަދި އިޒުރޭލު ވަށައިގެން ހަމަލާތައް އޮހޭތަން އެމެރިކާ އަށާއި އިޒުރޭލަށް ފެންނާނެ އެވެ.