ރާއްޖޭގެ އިގްތިސާދި ސަަރަހައްދު ބަލަހައްޓަން ގެނައި ޑްރޯންތަކާ ގުޅޭ ގޮތުން ޑިފެންސް މިނިސްޓަރު ޣައްސާން މައުމޫނާ ސުވާލު ކުރަން ރައްޔިތުންގެ މަޖިލީހަށް ހާޒިރުކުރަން ނިންމައިފި އެވެ.
މިނިސްޓަރާ ސުވާލުކުރަން ހުށަހެޅުއްވީ އިދިކޮޅު އެމްޑީޕީގެ ގަލޮޅު ދެކުނު ދާއިރާގެ މެމްބަރު މީކާއިލް އަހްމަދު ނަސީމެވެ.
މީކާއިލް ހުށަހެޅުއްވީ ޑްރޯންތައް ބޭނުންކުރަމުންދޭތޯ އާއި އެ ޑްރޯންތައް މިހާތަނަށް ބޭނުންކޮށްފައިވަނީ ކޮންކޮން ބޭނުމަކުތޯ ސާފުކުރުމަށެވެ.
ރާއްޖެއަށް ޑްރޯން ގެނައީ ތުރުކީއަށް ރައީސް ޑރ. މުހައްމަދު މުއިއްޒު ކުރެއްވި ރަސްމީ ދަތުރުފުޅަށްފަހު އެ ގައުމުންނެވެ.
ތުރުކީ ޑްރޯންތައް ރާއްޖެ ގެނެސް އެމްޑީއެފްގައި މިދިޔަ މާޗް އަލަށް ވައިގެ ބާރެއް އުފައްދައި ޑްރޯންތައް ބޭނުންކުރަން ރަސްމީކޮށް ފެށި އެވެ.
ތުރުކީގައި އުފައްދާ "ބައިރަކްތާރު ޓީބީ2" ބްރޭންޑްގެ ތިން ޑްރޯން ރާއްޖެ ގެނެސްފައި ވަނީ 570 މިލިއަނެއް ރުފިޔާ ހޭދަކޮށްގެން ކަމަށްވެ އެވެ. އަދި އިތުރު ޑްރޯންތައް ގެނައުމަށްވެސް ނިންމާފައިވެ އެވެ.
މިއީ އިންޓެލިޖެންސް އޮޕަރޭޝަންތަކާއި ސަވައިލެންސް އޮޕަރޭޝަންތައް ކުރިއަށް ގެންދިއުމުގެ ގާބިލުކަން ލިބިފައިވާ ޑްރޯންތަކެއް ކަމަށް ސަރުކާރުން ބުނެ އެވެ.