ހދ. ހިރިމަރަދޫ ރައްޔިތުން ވަރަށް އަވަހަށް އެހެން ރަށުން ބަދަލުކޮށްދިނުމަށް އެ ރަށު ކައުންސިލުން އަނެއްކާވެސް ސަރުކާރުގައި އެދިއްޖެ އެވެ.
ލޯކަލް ގަވަރުމަންޓް މިިނިސްޓަރު އާދަމް ޝަރީފް އުމަރު ރޭ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ ހިރިމަރަދޫގެ ރައްޔިތުން އެހެން ރަށަކަށް ބަދަލުކުރުމުގެ މަސައްކަތް އަވަސްކޮށްދިނުމަށް އެ ރަށު ކައުންސިލްގެ ރައީސް މުހައްމަދު ވަހީދު އެދިވަޑައިގެންފައިވާ ކަމަށެވެ.
މިނިސްޓަރު ވިދާޅުވީ އެ ރަށުގެ ނެރު ތިލަވުމުގެ ސަބަބުން ރަށަށް ދަތުރުކުރާ ފަރާތްތަކަށް ކުރިމަތިވެފައިވާ ދަތިތައްވެސް މިނިސްޓްރީގެ ސަމާލުކަމަށް ގެނެސްފައިވާ ކަމަށެވެ. އެހެންވެ ގުޅުންހުރި ފަރާތްތަކާއެކު އެ މައްސަލަ ހައްލުކުރުމަށް މަސައްކަތްކުރާނެ ކަމަށްވެސް ވިދާޅުވި އެވެ.
ހިިރިމަރަދޫގެ ރައްޔިތުން މީގެ ކުރިން ވަނީ ކ. ތުލުސްދޫއަށް ހިޖުރަކުރަން ބޭނުންވާ ކަމަށް ބުނެފަ އެވެ. އެކަމާ ގުޅިގެން ތުލުސްދޫ ކައުންސިލުން ބުނީ ހިރިމަރަދޫގެ ރައްޔިތުންނަށް މަރުހަބާ ކިޔަން ތައްޔާރަށް ތިބި ކަމަށެވެ.
ހދ. ހިރިމަރަދޫއަކީ މަދު ބަޔަކު ދިރިއުޅެމުން އަންނަ ރަށެކެވެ. އެންމެ ފަހުގެ ބޯހިމެނެމުގެ ނަތީޖާއިން ދައްކާ ގޮތުގައި އެރަށުގެ އާބާދީއަކީ 293 މީހުންނެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އަތޮޅުތަކަށްވެސް ޒަމާނީ ފެންވަރުގެ ހިދުމަތްތައް ފޯރުކޮށްދިނުމުގެ ގޮތުން ރާއްޖޭގެ ފަސް ސަރަހައްދެއްގައި އާބަން ސެންޓަރުތައް ތަރައްގީކުރާނެ ކަމަށް ވިދާޅުވެފަ އެވެ. އަދި ކުދި ރަށްރަށުގެ ރައްޔިތުން އެފަދަ ރަށްތަކަށް ބަދަލުވުމަށް ބޭނުންވާނަމަ އެ ފުރުސަތު ދޭނެ ކަމަށްވެސް ރައީސް ވަނީ ވިދާޅުވެފަ އެވެ.