މޯލްޑިވްސް ޕްރޮފެޝަނަލް ސްޕީކާސް އެސޯސިއޭޝަން (އެމްޕީއެސްއޭ) އިން އެ ޖަމްއިއްޔާގެ މެމްބަރުންނާއި ބައިނަލްއަގުވާމީ ބައިވެރިންނާ ގުޅިގެން ދިވެހިރާއްޖޭގެ ފުރަތަމަ ޕްރޮފެޝަނަލް ސްޕީކަރުންގެ ސަމިޓަށް ރަޖިސްޓާ ވުމަށް ހުޅުވާލައިފި އެވެ.
އެމްޕީއެސްއޭ ޕްރޮފެޝަނަލް ސްޕީކާސް ސަމިޓް 2024 ބޭއްވޭނީ އެމްއެންޔޫ ފެކަލްޓީ އޮފް އެޑިޔުކޭޝަންގެ އޯޑިޓޯރިއަމް ގައެވެ.
މި ސަމިޓުގެ މަގުސަދުތަކުގެ ތެރޭގައި ވާހަކަދެއްކުމުގެ ހުނަރު ކުރިއެރުވުމާއި މުވާސަލާތުކުރުމުގެ ހުނަރުތައް އިތުރަށް ތަރައްގީކުރުން ހިމެނެ އެވެ.
މި އިވެންޓުގެ ތީމަކީ "ޑިސްކަވަ އެންޑް ގްރޯ" އެވެ.
މި ސަމިޓަކީ އެމްޕީއެސްއޭގެ މެމްބަރުންނަށާއި ވާހަކަދެއްކުމުގެ ދާއިރާއަށް ޝައުގުވެރިވާ ފަރާތްތަކަށް އަމިއްލަ ނަފްސަށް އޮންނަ އިތުބާރު އިތުރުކޮށް ގިނަ ފުރުސަތުތަކެއް ހުޅުވިގެންދާނެ ސަމިޓެކެވެ.
ވާހަކަދެއްކުންތެރިކަމުގެ ދާއިރާގައި ހަރަކާތްތެރިވާ ފަރާތްތައް އެއްތަނަކުން ބައްދަލުވެ މައުލޫމާތު ހިޔާލު ފާޅުކުރެވޭ މުހިއްމު ފުރުސަތަކަށްވެސް މި ސަމިޓް ވެގެންދާނެ އެވެ. މި ސަމިޓްގައި ބައިވެރިވުމުގެ ފުރުސަތު ވަނީ އާންމުކޮށް ހުޅުވާލާފަ އެވެ.
މި ސަމިޓްގައި ޕްރޮފެޝަނަލް ސްޕީކިން ދާއިރާއިން ދުނިޔޭގެ ލެވެލްގައި ފާހަގަކޮށްލެވޭ ބޭފުޅުންގެ ކީ ނޯޓް ސްޕީޗަސްތަކާއި މާސްޓާ ކްލާސްތަކާ ޕެނަލް ޑިސްކަޝަންތައް ކުރިއަށް ގެންދާނެ އެވެ.
މި މައުލޫމާތުތަކުގެ އަލީގައި ބައިނަލްއަގްވާމީ ފެންވަރުގެ ވާހަކަ ދެއްކުންތެރިއަކަށް ވުމަށާއި އެ ދާއިރާއިން ތަޖުރިބާކާރަކަށް ވުމަށް އެހީތެރިވާނެ އެވެ. އަދި ކޮމިއުނިކޭޝަން ދާއިރާގެ ތަޖުރިބާކާރަށް ވުމަށްވެސް މަގުހުޅުވިގެންދާނެ އެވެ.